2020 ishte një vit i zi, ndërsa 2021 do të bëjë dimër të vërtetë. Kështu u shpreh meteorologu Hakil Osmani në një intervistë me gazetaren Suela Demiri në studion e “ABC”-së ditën e sotme. Por si do të jetë moti sot dhe nesër? Meteorologu parashikoi se do të kemi reshje shiu thuajse në të gjithë vendin dhe dëborë në zonat malore.
“Dita e sotme ka qenë me mot të kthjellët, temperaturat kanë qenë të lartë, por pasdite dhe në mbrëmje presim vranësira dhe reshje shiu. Vranësirat në Itali do të përfshijnë edhe Shqipërinë. Nesër kemi në pjesën e parë të ditës reshje në të gjithë vendin, me intensitet mesatar, ndërsa në zonat malore reshje të pakta dëbore” tha ai.
Java do të jetë me luhatje. “Presim përmirësim të kushteve të motit nga nesër në mesditë dhe pasdite, që do të vijojë edhe gjatë të martës, ndërsa e mërkura dhe e enjtja rikthejnë reshjet e shiut, ndërsa në zonat malore reshje të pakta dëbore. E premtja rikthen motin e qëndrueshëm dhe fundjava do të jetë me mot të mirë dhe vranësira të pakta”.
Por a do të kemi dëborë për Krishtlindjet dhe natën e ndërrimit të viteve? “Është ende herët për të folur por duke qenë se kemi këto lëvizje të ndjeshme pritet që të kemi prezencë të shiut dhe dëborës në zonat malore por është ende herët nëse do të ketë dëborë në kryeqytet”.
Hakil Osmani parashikon një dimër të vështirë.“Do të jetë kryesisht deri në 17 dhjetor mot i qëndrueshëm. Pas kësaj date presim sërish rikthimin e vranësirave dhe reshjeve në zonat perëndimore, ndërsa në zonat malore do të jenë më të dukshme reshjet e dëborës. Janari dhe shkurti priten të sjellin dimër të vërtetë. Do të ketë prezencë të shiut dhe dëbore, do të kemi një dimër tipik gjatë vitit 2021″.
2020-tën, meteorologu e cilësoi si të zi. “Për motin ka qenë një vit i zi, kemi pasur thatësirë, por edhe vlerat termike kanë qenë më të lartë, temperaturat kanë qenë 1.2 gradë më të larta se vlerat normale. Muajt nga shkurti në tetor kanë sjellë këtë anomali, përjashtim bën nëntori që kanë qenë tipik për vjeshtën”. /Abcnews.al
