Në një kohë kur janë publikuar pamjet tronditëse nga spitali “Shefqet Ndroqi”, i kthyer tashmë në Covid2, ku me dhjetra ambulanca janë në pritje për të shtruar pacientët me koronavirus, ministrja e Shëndetësisë, Ogerta Manastirliu, ka zgjedhur të japë show te spitali Infektiv.
Sipas të dhënave të publikuara dje nga Ministria e Shëndetësisë në 4 spitalet COVID në Shqipëri po trajtohen 469 pacientë me koronavirus, 31 në terapi intensive, 11 janë të intubuar.
Jashtë dyerve të spitaleve ndodhen familjarë të shumtë në pritje të ndonjë lajmi të mirë me sytë nga mjekët.
Manastirliu ka publikuar një video nga momentet që pacientët flasin me familjarët e tyre në shtëpi por edhe jashtë ambienteve të spitalit.
“Jemi shumë mirë, edhe ti do të bëhesh mirë fare, pa merak fare. Si dukesh mirë, shyqyr, shyqyr, mashalla”, dëgjohen në video familjarët duke motivuar të afërmit e tyre në spital.
Në videon e publikuar, Manastirliu sqaron familjarët e disa pacientëve lidhur me mënyrën e komunikimit, por në fakt ajo sot duhej të kishte në qendër të vëmendjes situatën në spitale, e cila po rëndohet dita ditës, dhe po tregohet se edhe 4 spitalet Covid nuk po ulin fluksin dhe orët e pritjeve të pacientëve në ambulanca, para se të shtrohen në spitale.
Ndoshta ministrja Manastirliu duhet të lerë mënjanë propogandën dhe të verë në zbatim plane apo skema të tjera të përballimit të flukseve të pacientëve me Covid, përfshi këtu edhe hapjen e spitaleve rajonale apo pavionëve të veçantë në to.
Komunikimi mes familjarëve dhe pacientëve të shtruar në spitalet Covid ku trajtohen është diçka shumë e rëndësishme, por më e rëndësishme është krijimi i kushteve, rritja e kapaciteteve dhe shmangia e orëve të pritjes në ambulanca, pavarësisht se si argument jepet triazhimi i të sëmurëve.
