Një ditë më parë është raportuar gjerësisht për ndarjen nga jeta të Arianit Alliu, 46-vjeç, drejtor i Pallatit të Kulturës në Librazhd, i cili ishte shtruar prej ditësh në spitalin Infektiv, pasi u infektua me Covid.
I ndjeri është përcjellë sot për në banesën e fundit. Por ndonëse deputeti i zonës dhe bashkia e Librazhdit konfirmuan faktin se shkak i ndarjes para kohe nga jeta të artistit librazhdas ishte Covid-19, emri i tij nuk figuroi as një ditë më parë dhe as ditën e sotme në të dhënat e Ministrisë së Shëndetësisë.
Përmes një mesazhi në “Facebook”, Bashkia e Librazhdit, si dhe kreu i grupit parlamentar të PS-së, Taulant Balla shprehën ngushëllimet për ndarjen nga jeta të Alliut.
Balla shkruan se Alliu ishte për të një mik i mirë dhe se Librazhdi humbi një artist që sillte vetëm gëzim.
“Lamtumirë Nit i dashur! Nuk arritëm dot të të mbajmë në jetë nga ky armik i pabesë. Doktoreshë Najada dhe stafi i saj bënë gjithçka, por nuk qe e thënë që një njëri i shkëlqyer si ti ta fitonte këtë betejë”, tha Taulant Balla.
Sakaq, mediat raportuan mëngjesin e sotëm se Munir Xhepa, efektiv i Policisë Rrugore në Bulqizë, 50-vjeç, ka ndërruar jetë nga koronavirusi.
I ndjeri ka ndërruar jetë mbrëmjen e djeshme në spital, ku ishte futur prej pesë ditësh në intubim për shkak se gjendja e tij shëndetësore ishte përkeqësuar. Por nga të dhënat e Ministrisë së Shëndetësisë nuk figuronte asnjë pacient nga Bulqiza, që mund të ketë ndërruar jetë në 24 orët e fundit. Mbeten të paqarta, sesi përditësohen të dhënat nga ministria, çdo 24 orë.
Njoftimi i MSH më 2 dhjetor
Në 24 orët e fundit kanë humbur jetën 17 persona: 5 qytetarë nga Durrës, 4 qytetarë nga Tirana, 2 qytetarë nga Vlora, 1 qytetar nga Saranda, 1 qytetar nga Gjirokastra, 1 qytetar nga Fieri, 1 qytetar nga Kavaja, 1 qytetar nga Lezha, 1 qytetar nga Cërriku.
Njoftimi i MSH më 3 dhjetor
Me gjithë përpjekjet e mjekëve, në 24 orët e fundit, kanë humbur jetën 13 qytetarë me Sars-Cov2 pozitiv në spitalet COVID: 2 qytetarë nga Fieri, 2 qytetarë nga Vlora, 2 nga Berati, 2 nga Durrësi, 1 qytetar nga Tirana, 1 qytetar nga Lushnja, 1 qytetar nga Elbasani, 1 qytetar nga Pogradeci dhe 1 qytetar nga Korça.
