Një tjetër qendër masazhesh, ku ushtrohej dhe prostitucion, është zbuluar nga policia e Tiranës. Burime zyrtare nga policia bënë me dije se qendra ndodhej në “Don Bosko”, ndërsa në aksionin e policisë u arrestua menaxheri i qebdrës, u proceduan 4 vajza si dhe u shpall në kërkim pronari.
Burime zyrtare bënë me dije se, specialistët e Seksionit për Hetimin e Trafiqeve të Paligjshme në Drejtorinë Vendore të Policisë Tiranë, pasi kishin siguruar të dhëna në rrugë operative se në rrugën “Don Bosko” disa shtetase shfrytëzoheshin për prostitucion nga menaxheri dhe pronari i një qendre masazhi, kanë organizuar punën për të dokumentuar veprimtarinë kriminale të këtyre shtetasve.
Të njëjtat burime shtuan se, në bazë të provave të grumbulluara, si rezultat e një pune disamujore, u kap dhe u vu në pranga menaxheri i qendrës së masazhit, shtetasi K. Sh., 28 vjeç, banues në Tiranë, si dhe u shpall në kërkim pronari i kësaj qendre, shtetasi E. Sh., 23 vjeç.
Sipas policisë, këta shtetas, në bashkëpunim me njëri-tjetrin, rekrutonin femra nëpërmjet rrjeteve sociale, me pretendimin për t’i punësuar si masazhatore dhe më pas i detyronin ato që t’iu ofronin klientëve të qendrës së masazhit edhe shërbime seksuale. Klientët e kësaj qendre bënin pagesa për dy shërbime dhe përfitimet ndaheshin ndërmjet administratorit dhe punonjëseve që kryenin këto shërbime.
Policia njoftoi po ashtu se u proceduan penalisht edhe 4 shtetase të punësuara në këtë qendër, për veprën penale “Prostitucioni”.
Javët e fundit, policia e Tiranës ka realizuar disa operacione të ngjashme.
