Italianët do ta kenë të ndaluar të lëvizin mes rajoneve për Krishtlindje dhe Vitin e ri. Kjo është vetëm një prej masave të reja të njoftuara të mërkurën nga ministri i Shëndetësisë Roberto Speranza. Në fjalën e tij në Senat, Speranza theksoi se kufizimet do të implementoheshin gjatë sezonit festiv për të shmangur rritje të infektimeve me Covid-19.
“Do të na duhet të reduktojmë rrezikun e përhapjes së pandemisë së shkaktuar nga lëvizjet e qytetarëve që duan të festojnë bashkë Krishtlindjet dhe Vitin e Ri. Masat janë jetësore nëse duam të shmangim përkeqësim të situatës e cila ka nisur të përmirësohet”, tha Speranza.
Lëvizjet përmes rajoneve do të jenë të ndaluara nga 4 dhjetori deri në 6 janar. Dyqanet në zonat e kuqe, pra ato me rrezikshmëri të lartë, do të rihapen, por shtetrrethimi nga ora 10 e mbrëmjes do të qëndrojë në fuqi, përfshirë natën e ndërrimit të viteve. Baret dhe restorantet do të mbyllen në orën 6 të pasdites. Pistat e skive do të mbeten të mbyllura, e po ashtu palestrat, ndërsa meshat në Kisha do të duhet të mbarojnë para shtetrrethimit në orën 22:00. Reagimi i italianëve të frustruar nga kufizimet ishte i ndryshëm.
“Kufizimet janë gjë e mirë. Shumë njerëz po vdesin dhe duhet treguar kujdes”, u shpreh një banore.
“Nuk po na lenë të bëjmë asgjë. Nuk duan as që të shkojmë në kishë e na thonë ta shohim meshën oline. Për Krishtlindje duhet shkuar në Kishë”, tha një tjetër.
Italia është vendi i parë europian i goditur nga koronavirusi dhe me mbi 56 mijë jetë të humbura ka bilancin e dytë më tragjik pas Britanisë së Madhe.
