Nga Boldnews.al
Iku nga kjo botë nga Covidi. Kryeqyzimit të “21 Dhjetorit” do i mungojë një personazh emblemë, që të zgjaste dorën për ndonjë lëmoshë, e nëse nuk i jepje nuk bzante, nëse të ndodhej ndonjë qindarkë për të ishte bukë, për ne, një personazh i veçantë. Emrin e vërtetë e kishte Enver Ismaili, por shumëkush në të zhurmshmen Tiranë urbane e njihte si “Ver Llapa”.
I kishte mbetur ky pseudonim sepse kur dikush i thonte të nxirrte gjuhëen ai e bënte dhe pa u fyer, fundja nuk fshihej pas pamjes, nuk hiqej ai që nuk ishte, dhe nuk vidhte apo të trazonte. Por Veri është fyer, jo nga ai qytetar që i thonte nzirre një herë gjuhën, por nga pushtetarët, sistemi ynë i shëndetësisë, qenërit e politikës në Parlament dhe llapaqenët publik, që llapë nuk nxjerrin, por me llapë bëjnë kërdinë me taksat tona, me fondet publike, në konçesione, në korrupsion dhe në alleshverish.
Veri iku nga Covidi, por për të nuk u ngrit një çartër që ta çonte në Itali, Turqi a në ndonjë vend tjetër. Për të nuk u ndez as edhe një ambulancë e lodhur e shëndetësisë sonë. Nuk u bë gati asnjë shtrat në një nga spitalet covid. Veri iku edhe pa hyrë në fuqi vendimi i “madh” i qeverisë për rimbursimin e ilaçeve që përdoren për të luftuar koronavirusin.
Ky burrë dorëzgjatur iku edhe pa e kuptuar se prej vitesh kishte bërë si “punën e tij” kryeqyzimin e 21 Dhjetorit. Veri shkoi edhe pa e parë një ditë të vetme mungesës e ndotjes në atë zonë. Iku pa ndenjur një ditë të vetme pa kamionët e oligarkisë dhe betonieret e tyre që i shkonin anash këmbëve.
Po emrin e tij e përbuzën, e fyen, e bullizuan qeniet e neveritshme që e mbajnë vetën për elitë, por mbeten llumi i madh i shoqërisë. Deputetët, ministrat e ca më lart tyre, do e kenë pak të vështirë tashmë e tutje të bëjnë batutaxhiun e rëndomtë, duke e “fyer” kolegun si “Ver Llapa”… Ata e thonin për fyerje, por në fakt të jesh njeri i mirë, të zgjasësh dorën për lëmoshë, por mos i bësh keq kujt sot është “turp”, “i paaftë” dhe shkak që llapaqenërit e vërtetë dhe buzëyndërët e pushtetit të të fyejnë…!
Sa herë kanë kaluar eskortat qeveritare pranë këmbëve të Verit? Shumë herë, e po aq herë ndonjë syresh qeveritar ka nisur të bëjë ironinë, batutat që janë edhe më të ulëta se ata të burgut dhe është krekosur me veten që mund të mos e ketë gjuhën të gjatë… Ama llapën e ka përdorur për t’iu lëpirë shefit, për të bërë lajka e like në rrjetet sociale, për të bërë fushatën elektorale, për të blerë vota për Rilindjen dhe kaq është merita e tij, që të gjendet në listën e deputetit, apo në ndonjë drejtori të rëndësishme ku gëlon paraja e madhe.
Në të vërtetë gjuhën na e nxjerrin këta qeveritarë që edhe pse kanë dekada që na rjepin, vjedhin, gjobisin, marrin pronën, mohuar të drejtën, sërish i votojmë, mbajmë radhë për të dhënë verdiktin e në fund ankohemi e sërish mbetemi peng i tyre. Ndoshta Veri i mirë nuk e kishte fare këtë siklet; kurrë nuk votoi dhe kurrë nuk u zhgënjye, ai e njihte racën e llapaqenëve më mirë se kushdo!
