Sindikata Solidariteti, përmes një postimi në rrjetet sociale, ka denoncuar një skandal, të kompanisë Teleperformance, e cila u kërkon punonjësve të saj instalimin e kamerave në hapësirat private të shtëpisë, prej ku ata punojnë që nga fillimi i pandemisë.
Sipas sindikadës, pas firmosjes së kontratës WAHA (Work At Home Agent), punëtorëve iu është dhënë njoftimi se kompania do iu kërkojë atyre instalimin e kamerave në hapësirat private nga ku ata do punojnë.
Pjesa më e madhe e punonjësve, thuhet në denoncimin e sindikatës, nuk kanë hapësira të veçanta për punë në shtëpitë e tyre, çka bën që një pjesë e madhe e tyre pajisjet e punës t’i kenë të vendosura në ambiente të përbashkëta me anëtarë të tjerë të familjës, siç mund të jenë dhomat e gjumit, sallonët e ndejtjes etj.
Vendosja e kamerës në një ambient të tillë cenon jo vetëm privatësinë e punëtorit, por edhe të të gjithë familjes së tij. Një veprim i tillë është skandaloz dhe i papranueshëm.
Sipas kompanisë një gjë e tillë duhet të bëhet për të mbikëqyrur punën dhe për të siguruar ruajtjen e të dhënave të klientit.
Asnjëri nga këta argumenta nuk qëndrojnë”, thekson Sindikata.
Duke dhënë argumentet, sindikata shprehet se mbikëqyrja e procesit të punës bëhet plotësisht dhe pa asnjë mangësi përmes sistemeve të brendshme dhe software-eve të posaçme.
“Në emër të ruajtjes së privatësisë dhe të dhënave të klientit, po shkelet me të dyja këmbët privatësia e punëtorit dhe e familjarëve të tij. E pavarësisht kësaj, instalimi i kamerës në tavolinën e punës nuk garanton asnjëlloj sigurie të të dhënave të asnjërës palë.
Ky veprim po kundërshtohet tashmë nga pjesa më e madhe e operatorëve. Sindikata Solidariteti ka ndjekur të gjitha procedurat e parashikuara me ligj dhe iu është drejtuar të gjithë institucioneve përkatës. Gjithashtu, ne i kemi kërkuar kompanisë që të fillojë diskutimet me përfaqësuesit e Sindikatës dhe ta pezullojë një proces të tillë, i cili ndër të tjera është dhe i paligjshëm.
Neni 8 i Konventës Ndërkombëtare për Mbrojtjen e të Drejtave dhe Lirive Themelore të Njeriut, si dhe Kushtetuta e Republikës së Shqipërisë garantojnë të drejtën e çdo qytetari për mbrojtjen e jetës private. Udhëzimi Nr.3 i datës 05.03.2010, i cili i referohet Ligjit Nr. 9887, shprehet qartë se vendosja e kamerave në hapësira private është e ndaluar”, thekson sindikata.
