Kryetarja e LSI, Monika Kryemadhi, i ka konsideruar akuzat e hedhura nga Kryeministri Edi Rama ndaj kreut demokrat, Lulzim Basha, për çështje të lidhura me luftën e Kosovës, se nuk janë gjë tjetër veçse largim nga përgjegjësia e Ramës, nga premtimet që nuk ka mbajtur asnjëherë.
Kryemadhi tha se po tentohet një shfokusim i vëmendjes së qytetarëve shqiptarë nga varfëria, mungesa e punësimit, mosrimbursimi i ilaçeve të pandemisë etj.
“Unë jam e bindur se z. Basha ka qënë shumë i qartë dhe e ka sqaruar pozicionin e tij në deklaratat që kanë të bëjnë për sa i përket akuzave të Ramës.
Ajo që dua të theksoj është se qëndrimi i LSI-së vazhdon, dhe imi personal, vazhdon të jetë po i njëjtë dhe i pandryshueshëm në asnjë pikë dhe asnjë presje. Për ne lufta e djemve dhe vajzave të UÇK dhe popullit të Kosovës është jo vetëm luftë e drejtë dhe legjitime, por është luftë që liri që ka sakrifica sublime të të rinjve, të popullit të Kosovës dhe përballë krimeve dhe genocidit të Milosheviçit dhe gjithë onturazhit të tij ushtarak, politik e meditik, është e patjetërsueshme ta tjetërsosh e ta kthesh atë ashtu siç po duan ta risjellin në jetën politike të secilit nga ne.
Unë në fakt do të doja të shprehja jo vetëm besimin e plotë për të gjithë udhëheqësit dhe përfaqësuesit e kësaj lufte dhe përkrahjen time por edhe të LSI, jam e bindur se ata përsëri do ta fitojnë betejën me mekanizmat antishqiptare, që për hir të së vërtetës kanë filluar të lulëzojnë në rajon.
Ajo që dua të theksoj, tërheqja e vëmendjes për t’u marrë me çështje që nuk i takojnë politikës shqiptare – politikës shqiptare i takon të merren sot me situatën në të cilën gjenden shqiptarët, me mungesën e shpresës, me mungesën e punës, me mungesën e ekonomisë në xhepat e shqiptarëve dhe mendoj se rihapja e një debati të tillë nuk është veçse largim nga përgjegjësia, nga premtimet që nuk janë mbajtur asnjëherë, fokusimin e vëmendjes së qytetarëve shqiptarë nga problemet që janë të përditshme të mungesës së punës, të mungesës së mundësisë për të jetuar, të dëshirës së të rinjve për t’u larguar nga Shqipëria, krijojmë hapësira të tjera dhe flasim…
Një kryeministër që merret me një gjë që nuk ekziston në fakt, kur duhet të merret me rimbursimin e ilaçeve të Covid, me krijimin e pavioneve në çdo spital rajonal, të bëjë testime në masë, që të izolohen rastet me Covid-19 dhe më pas të gjurmohen për të krijuar mundësi për të zhvilluar jetën normalisht eshe pse jemi më kuadrin e një pandemie”, shprehet Kryemadhi.
