Nga Klodian Tomorri
Qeveria paguan naftëtarëve pagën për 1 vit, por kompanive që e kanë shfrytëzuar ARMO nuk u sekuestron asnjë aset. Në këtë rast, pagesa e rrogave për naftëtarët është subvencion i drejtëpërdrejtë për pronarët e kompanive që kanë vjedhur ARMO-n. Është vjedhje e parave të qytetarëve për të subvencionuar ata që kanë vjedhur ARMO-n.
Qeveria ka paguar mbi 500 milionë euro për ARMO-n, herë si taksa të pambledhura dhe herë si pagesa rrogash për punonjësit. Me kaq para, ARMO është blerë 4 herë, dmth duhet të ishte vënë nën pronësi të shtetit me kohe.
Është rregulli më i thjeshtë. Kur fut kapital në një kompani për të mbuluar humbjet, ndërkohë që aksionerët e tjerë nuk e bëjnë ti merr pronësinë e kompanisë sepse ndryshon e raportet e aksioneve. Por këta nuk e bëjnë. Qeveria fut paratë e qytetarëve për të mbuluar vjedhjet dhe humbjet e ARMO-s, ndërkohë që pronësinë e mbajnë të tjerët.
Këta kanë gjetur një skemë që mbulojnë humbjet pa ndryshuar strukturën e pronësisë. Kjo është vjedhje e parave të qytetarëve. Dhe pjesa më qesharake është se këtë e trumbetojnë si veprim të mirë.
Merrini aksionet e ARMO-s mbrapsht. Veç kësaj, sekuestroni asetet e të gjitha kompanive që e kanë shfrytëzuar dhe nuk kanë paguar taksat. Ndiqni ligjerisht aksionerët që nuk duan të paguajnë detyrimet. Pastaj bëni politika sociale.
