Shkencëtarët danezë kanë zbuluar një lloj vaksine efektive ndaj koronavirusit të mutuar të gjendur te vizonët, i quajtur Cluster-5.
Autoritetet e Danimarkës nisën javën e kaluar planin për të zhdukur 17 milionë vizonë, një nga popullatat më të mëdha në botë, pasi koronavirusi mutant i gjetur në to mendohej të ishte shumë më rezistent ndaj vaksinave të ardhshme kundër Covid-19.
Anders Fomsgaard, një shkencëtar, i cili merret me sëmundjet infektive, tha se antitrupat në lepujt e trajtuar arritën të mposhtnin me sukses variatin e Cluster-5.
“Ne nuk mund t’i rezistonim testimit të antitrupave të lepurit kundër Cluster-5 dhe funksionoi. Nëse kjo vlen edhe për vaksinat e tjera apo për antitrupat njerëzorë, nuk e dimë ende”, tha Fomsgaard.
Vaksina kandidate, e cila është në fazat e hershme të zhvillimit, së shpejti do të kalojë në prova njerëzore dhe është e pasigurt nëse do të ketë të njëjtin efekt, shkruan TheGuardian.
Qendra Evropiane për Parandalimin dhe Kontrollin e Sëmundjeve tha këtë të enjte se ka pasiguri të lartë në lidhje me kërcënimin e paraqitur nga përhapja e virusit në vizonë, mutacionet dhe transmetimin e tij tek njerëzit.
