Për herë të parë, prej muajit mars kur u shfaq edhe pandemia e Covid-19, Ministria e Shëndetësisë ka njoftuar sot se në Shqipëri janë realizuar 2723 testime në total, përfshi këtu edhe ato në klinikat apo spitalet private të licensuara.
Elementi i dytë në deklaratën zyrtare ishte se nga 2723 testime, 984 kishin efekt depistimi.
Zakonisht depistimet kryen për efekte statistikore në grupime apo individë që ose e kanë domosdoshmëri testin e Covid-19 për shkak të udhëtimeve jashtë vendit, duke zbatuar kështu kërkesat e vendeve të tjera, ose janë në pritje të një ndërhyrjeje kirurgjikale, ose janë individë të shëndetshëm që përzgjidhen rastësisht si një kampion në një zonë apo disa zona.
Nuk dihet se sa nga 984 personat që i janë nënshtruar testeve për depistim kanë rezultuar të infektuar, pasi deklarata zyrtare nuk bën një ndarje të rasteve të konfirmuara nga totali i testimeve të kryera.
Por nëse bëhet një llogaritje e thjeshtë duke zbritur testet e depistimeve nga numri total i testimeve dhe nëse merret i mirëqënë fakti se te të depistuarit ka pasur 0 raste, atëherë rezulton se nga 1739 tampone kanë rezultuar pozitivë 563 qytetarë, një shifër të infektuarish rreth 33 % e testimeve të kryera. E thënë më thjesht 1 në 3 persona të testuar rezulton i prekur. Kjo është nga përqindjet më të larta të evidentuara jo në Shqipëri, e cila prej muajsh nuk teston në nivelet apo shifrat e duhura në raport me situatën, por edhe me shumë prej vendeve të BE-së.
