Që nga 1 janari 2016 e deri më sot, në sektorin publik në shëndetësi janë shpallur 4881 procedura për prokurime publike, nga të cilat janë shpallur tenderë fitues 85 për qind e tyre.
Të dhënat janë prezantuar dje nga një organizatë e Open Data-s, ndërkohë që ato janë publike dhe kalkulohen nga një bazë të dhënash në portalin Prokurime Transparente në Shëndetësi, openprocurement.al.
Ajo çka bie në sy në këtë raport është fakti se janë dhjetë kompani që kanë fituar afro gjysmën e totalit të vlerës së kontratave, shkruan Shekulli.
Drejtuesit e portalit, gjatë prezantimit, u shprehën se projekti synon të rrisë cilësinë e procesit të prokurimeve publike edhe përmes kontrollit dhe presionit qytetar, ndërsa portali do të shërbejë për informim, transparencë dhe monitorim qytetar.
Kontratat
– Në nëntëmujorin e parë të vitit 2016 janë shpallur 4881 procedura për prokurime publike.
– Gjatë kësaj periudhe numri i tenderëve të finalizuar me fitues, është 4119. Pjesa tjetër janë procedura të anuluara apo procedura për të cilat ende nuk ka përfunduar procesi i prokurimit.
– Në total fondi limit, pra vlera e vënë në dispozicion të procedurës për tendera, tashmë të konkretizuar me shpallje fituesi dhe lidhje kontrate, është 6.72 miliard Lekë ose e konvertuar 55.1 milion dollarë.
– 4119 kontratat dhe vlera prej 55.1 milionë dollar, janë fituar nga 430 operatorë ekonomikë, kontraktorë.
– Vlera e kontratave të lidhura, pa TVSH është 6.31 miliardë lekë ose 51.77 dollar amerikan.
– Diferenca ndërmjet Fondit Limit dhe Ofertës së Shpallur Fituese është 6.1 për qind e fondit të vënë në dispozicion. Kjo diferencë tregon cilësinë e konkurrueshmërisë, dhe eficencën buxhetore përmes prokurimeve.
– Kjo diferencë, përkon me pará të kursyera si rezultat i konkurrencës dhe ofertimit më të mirë ekonomik.
– Përmes procedurës pa garë, (Negocim i Drejtpërdrejtë) janë lidhur kontrata me një vlerë 1.55 miliardë lekë.
– Kjo vlerë është 24.5 për qind e totalit të Vlerës së Kontratës.
– Me konkurrent të vetëm në garë, janë realizuar 1260 procedura, me vlerë oferte 1.04 miliardë lekë që përkon me 16.5 për qind të vlerës totale të ofertave. 4.9 për qind e vlerës së kontraktuar përkon me Punë Publike (investime), 25.4 për qind e vlerës totale janë Shërbime, 69.6 për qind janë Furnizime Publike dhe pjesa e mbetur janë Marrje me Qira dhe Shërbime Konsulence.
– Dhjetë kompanitë e listuara si kompani me vlera më të larta të kontratave të fituara, në tërësi kanë 46.9 për qind të totalit të vlerës së kontratave.
– Kompania me vlerën më të lartë të kontratave në sektorin shëndetësi për nëntëmujorin e 2016, ka 352 kontrata me një vlerë prej 452 milionë lekësh. Ndërkohë që përveç vlerës së shënuar më lart, kjo kompani ka edhe të tjera kontrata, ku ka fituar në bashkime operatorësh me kompani të tjera.
– Autoriteti Prokurues me vlerat më të larta të tenderuara është Qendra Spitalore Universitare “Nënë Tereza”. Ky institucion ka kontraktuar 2.15 miliardë lekë.
