Kryeministri Edi Rama shmangu sot një koment lidhur me zgjedhjet në SHBA. Rama u pyet se kë do të preferonte të ishte President i SHBA mes Donald Trump dhe Joe Biden, ndërsa theksoi se “i kam të dy miq, nëse do më thonit se kë do të preferoja mes Lulzim Bashës dhe Monika Kryemadhit, padiskutim që do të zgjidhja Lulin”.
Duket se Rama ka reflektuar nga qëndrimi i mbajtur 4 vite më parë, kur në zgjedhjet amerikane ishin përballë Trump dhe Hillary Clinton. Në atë kohë Rama u rendit jo vetëm në krah të Clinton, por e konsideroi zgjedhjen e Trump si fatkeqësi për njerëzimin.
“Donald Trump është një kërcënim për Amerikën, dhe padyshim, një kërcënim për marrëdhëniet Shqipëri-SHBA”, deklaronte Rama, 4 vite më parë.
Gjatë Presidencës Trump, Kryeministri Edi Rama nuk ka mundur të zhvillojë asnjë vizitë zyrtare në Shtëpinë e Bardhë, edhe pse ka pasur disa takime me Donald Trump, gjatë samiteve të NATO-s.
