Lulzim Basha, kryetar i PD, tha sot në një konferencë për mediat, se numri i viktimave nga Covid-19 është më i lartë se ai që raportohet zyrtarisht. Basha tha se Shqipëria duhet të realizojë mbi 2500 testime në ditë, ndërsa akuzoi Kryeministrin Edi Rama se po vijon pagesat për mafien e plehrave.
“Nëse paratë e shqiptarëve do t’i kursesh në një ditë të zezë, kjo është dita e zezë për shqiptarët. Ai i ka paratë, por nuk i hedh për shqiptarët, por për mafien e plehrave”, tha Basha.
Duke e cilësuar Ramën një prestigjator të lodhur, Basha tha se ai është i gatshëm të hapër çdo debat, vetëm mos i përgjigjet pyetjeve pse nuk rrit testimet, pse nuk paguan ato që janë në nevojë akute me paratë prej 13 mln euro që i jep inceneratorëve, pse nuk hap spitalet e tjera Covid, pasi ato ekzistuese janë tej kapaciteteve”.
Duke e cilësuar si një deklaratë kriminale atë të Ogerta Manastirliut, e cila tha se “do të zgjedhim se kush do të trajtohet dhe kush jo në spitale”, Basha tha se shkuam në këtë pikë se paratë i kanë vjedhur.
“Çfarë është kjo, kush është ky që zgjedh se kush do të jetojë dhe kush do të vdesë? Paratë e taksave tuaja i ka marrë dhe i ka çuar te mafie e plehrave, te koncensionet, te zyrat e luksit, te rrugët me 5 fishin e kostove reale. rama vazhdon të tallet me shqiptarët, vazhdon sulmet ndaj opozitës, ku e gjen të drejtën Rama se kush do të jetojë e kush do të vdesë”, tha Basha.
