OFL u ka dërguar formularin për deklarimin e pasurisë dy personave nga Elbasani, të identifikuar si Llazar Bicja dhe Bledar Ibrahimi. Ky i fundit u dëbua nga Italia drejt vendit tonë në vitin 2016, pasi u zbuluan lidhjet të tij me elementë radikalë si dhe kishte dyshime për vendosje të kontakteve me Shtetin Islamik.
“Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
Ll. B., banues në Cërrik, i dënuar për veprën penale “Vrasja në rrethana të tjera cilësuese”;
B.I., banues në Elbasan, për të cilin Gjykata e Milanos, Itali, ka caktuar masën e sigurisë “Arrest në burg”, për veprën penale “Pjesëmarrja në organizatë terroriste”, parashikuar nga Kodi Penal italian”, thuhet në njoftimin e OFL.
Sipas saj, këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
