Kreu i Federatës Shqiptare të Futbollit, Armand Duka, bëri të ditur se ka zhvilluar një takim, këtë të premte, me kryeministrin Rama ku është diskutuar për bojkotin e futbollit.
Duka u shpreh për gazetarët se kryeministri i ka premtuar atij se do të marrë në konsideratë propozimin e Ligës. Megjithatë, Duka nuk dha një datë konkrete se kur do të nisë futbolli në Shqipëri.
“Kryeministri më ka premtuar se do të marrë në konsideratë propozimin tonë. Personalisht do të doja që futbolli të mos ishte ndërprerë, tani varet nga Liga nëse do të bindet”, tha Duka.
Kujtojmë që Kategoria Superiore ka vendosur bojkotimin e futbollit, prej më shumë se 6 javësh. Kërkesat e Ligës Profesioniste ndaj qeverisë janë si më poshtë:
- Të ulet TVSH në masën 6%.
2.Të falen gjobat dhe kamatëvonesat e detyrimeve tatimore, fiskale e të sigurimeve të prapambetura.
- Efektet e pezullimit të tatimit mbi të ardhurat personale të lojtarëve, të shtrihen nga 2 në 10 vite.
- Të miratohet Ligji i vërtetë i Sponsorizimeve, në vend të mashtrimit të qeverisë, që sot propagandohet si Ligj Sponsorizimi për Sportin.
