Kryeministri i Greqisë, Kiriakos Micotaqis, ka reaguar për here të parë pas deklaratave të Kryeministrit Edi Rama dhe ministrit të Jashtëm grek, Nikos Dendias, në Tiranë, se marrëveshja e detit do të vuloset në Gjykatën Ndërkombëtare të Hagës.
“Diskutimet tona me Shqipërinë po shkojnë në drejtimin e duhur, ku kemi rënë dakord që meqenëse nuk mund të zgjidhim mosmarrëveshjet tona rreth caktimit të kufijve të Zonave Detare, ne jemi të gatshëm t’i drejtohemi Gjykatës Ndërkombëtare të Drejtësisë.
Kjo është mënyra se si shtetet serioze dhe të përgjegjshme zgjidhin mosmarrëveshjet e tyre. Me fjalë të tjera, ne po provojmë, në praktikë, se me një udhëzues mbi të gjitha të drejtat ndërkombëtare, Ballkani dhe Mesdheu Lindor mund të bëhen zona të paqes dhe stabilitetit”, tha Kreu i Qeverisë greke.
Micotaqis përcolli një mesazh edhe për Presidentin turk Rexhep Taip Erdogan, duke e ftuar edhe Anakaranë të zgjidhë mosmarrëveshjet me gjuhën e dialogun në instancat ndërkombëtare.
“Edhe Turqia ka një vend, nëse dëshiron. Për sa kohë që Ankaraja zyrtare mund të ndajë të njëjtat rregulla, të njëjtën logjikë të imponuar nga marrëdhëniet e fqinjësisë së mirë dhe respektimi i ligjit ndërkombëtar”, tha ai.
