Partia Demokratike i është përgjigjur përmes ekspertit të ekonomisë, Dorian Teliti, Kryeministrit Edi Rama, lidhur me aeroportin e Kukësit.
Rama postoi në rrjetet sociale një video nga kantieri i punimeve për terminalin dhe zgjerimin e pistës së aeroportit në Kukës. “Me kantierin e Aeroportit të Kukësit, ku falë punës që vazhdon intensivisht po merr formë terminali i ri i pasagjerëve, po bëhet zgjatja e zgjerimi i pistës dhe po realizohet sipas standardeve të Bashkimit Europian një projekt i shumë ëndërruar, që do ta kthejë Kukësin në një pol ekonomik të verilindjes e do të përcaktojë fuqishëm të ardhmen e ekonomisë së Shqipërisë verilindore”, shkruan Rama, duke postuar videon e mëposhtme.
Një ditë më parë, Rama mbajti një konferencë për shtyp ku paraqiti projektet mbi infrastrukturën, portet dhe aeroportet. Rama premtoi se do të nisin procedurat për aeroportin e Vlorës dhe më pas për atë të Sarandës.
Lidhur me deklaratat e Ramës, reagoi Dorjan Teliti, sipas të cilit Kryeministri e përdor projektin e tij “sa herë kur përpiqet të fshehë një histori korrupsioni”.
“E gjithë zhurma e propagandës së Ramës për aeroportin e Kukësit është direkt e lidhur me aferën 400 milionëshe të inceneratorëve. Me shpresën se aeroportet dhe fluturimet imagjinare do të largojnë vëmendjen nga ky skandal, gdhihet dhe ngryset me premtime të pambajtura në 3D. Nga ato qe as stafi që ja përgatit nuk i beson më se mund të realizohen”, shkruan Teliti.
Sipas tij, qeveria dha me koncesion shërbimin e mirëmbajtjes së “Rrugës së Kombit” duke ironizuar se “ky qe investimi i vetëm i qeverisë për 7 vitet e fundit” për kuksianët.
Postimi nga Dorian Teliti
Sa herë ER premton aeroportin e Kukësit, aq herë përpiqet të fshehë një histori korrupsioni milionash. Ka kaq kohë që me gënjeshtra në 3D u ofron shqiptarëve udhëtime virtuale në aeroporte që duhet të ishin funksionalë që 3 vite më parë.
E gjithë zhurma e propagandës së ER për aeroportin e Kukësit është direkt e lidhur me aferën 400 milionëshe të inceneratorëve. Me shpresën se aeroportet dhe fluturimet imagjinare do të largojnë vëmendjen nga ky skandal, gdhihet dhe ngryset me premtime të pambajtura në 3D. Nga ato qe as stafi që ja përgatit nuk i beson më se mund të realizohen.
I vetmi “investim” për kuksianët këto 7 vjet ka qenë trau me pagesë në rrugën e kombit. Këtë nuk e fshehin as videot në 3d dhe as propaganda e zvjerdhur e Rilindjes së premtimeve boshe.
