Mjeku i njohur Gëzim Xhepa ka ironizuar në rrjetet sociale angazhimin e policisë në respektimin e vendimit për mbajtjen e maskave në ambientet e hapura nga qytetarët.
Xhepa shkruan në rrjet se policisë gjatë kësaj qeverisjeje ju besua korrja e hashashit, vjelja e faturave të dritave, gjobat e maskave…, dhe sot dëgjova dhe kontrolli i sipërfaqeve të tokës së mbjella me duhan, për vjeljen e taksave…!!!
“Po luftën kundër krimit që e ka mision, kur duhet ta kryejë…?!!! Apo krimi nuk kërcënon qeverinë…?!!! Për mbrojtjen e rendit, policia angazhohet vetëm kur kërcënohet Partia dhe zgjohet bagëtia popullore…!!!!”, shkruan Xhepa.
Prej 5 ditësh në Shqipëri po aplikohet mbajtja e maskave në mjedise të hapura në kuadrin e masave të Komitetit Teknik për të përballuar pandeminë Covid-19. Vendimi ka shkaktuar reagime të shumta, ndërsa shumë prej mjekëve profesionistë e kanë cilësuar vendimin si jo të bazuar shkencërisht dhe nuk do të ketë impakt në përhapjen e virusit.
Për zbatimin e vendimit është angazhuar Policia e Shtetit dhe ajo Bashkiake, e cila ka të drejtë vendosjen e gjobave 30 mijë lekëshe dhe në rast përsëritjeje 50 mijë lekë.
