Nga Boldnews.al
Matilda Makoçi, ylli i padiskutueshëm i kinemasë shqiptare në vitet ’80, u ringjit në skenë! Me një veshje artistike, por edhe me peshën e viteve mbi supe, ajo recitoi poezi dhe përcolli emocion përmes një zhanri të munguar: vargjeve, duke ngrohur edhe njëherë zemrat e fansave të vjetër, por edhe atyre më të rinj!
Më pas, siç ndodh shpesh në Shqipëri, ajo u bë preja e preferuar e mediave! Kështu, deklaratat e saj përpara gazetarëve, prezentë në këtë ngjarje artistike, mbi ish-bashkëshortin, kryeministrin Edi Rama, u transmetuan drejtpërdrejt e patën jehonë në rrjetet sociale si një triumf virtyti femëror, por edhe një model për ish-çiftin, dikur të famshëm. Dhe ndoshta, pikërisht këtu, lindën edhe dyshimet e para!
Thëniet e saj për ish-bashkëshortin, u konsideruan “too much sugar added” ose, si shumë të sheqerosura dhe u vunë në diskutim prej opinionit publik, shqetësim i cili u raportua gjerësisht, përmes portaleve apo platformave informative online.
Më konkretisht, thënia e saj se “Edi Rama ka qenë shoku im i rinisë me të cilin ndamë ëndrrat tona…”, u konsiderua si e qëllimshme dhe vërtetësia e saj u vu në diskutim. Sipas “Hashtag Albania”, në profilin e Alba Malltezit, bashkëpronare e grupit mediatik që intervistoi Matildën, e cila e kishte amplifikuar këtë deklaratë në Facebook, u hodhën dyshimet, nëse gjithçka që thuhej: A ishte e vërtetë? Dyshime të cilat buronin prej renditjes së fakteve, përmes disa videove të cilat nuk përkonin me çfarë konkretisht aktorja, ishte cituar të kishte thënë.
Redaksia e “Report TV” dhe “Shqiptarja.com”, të cilat e kishin transmetuar dhe e kishin publikuar respektivisht lajmin, fillimisht rezistuan dhe nuk reaguan, por kundrejt presionit në rritje, më në fund, u dorëzuan dhe publikuan regjistrimin audio me zërin e vetë Matilda Makoçit. Ndonëse edhe kjo, rezultoi të ishte një copë e montuar, pra jo lineare, pas krahasimit të materialeve, u vu re se ato nuk përputheshin dhe fraza kyçe “Edi Rama ka qenë shoku im i rinisë me të cilin ndamë ëndrrat tona…”, nuk ekzistonte!
Atëherë, si shpjegohet një gjë e tillë? Përse janë transformuar fjalët e Matildës dhe, a mos ndoshta dikush ka dashur të përfitojë në kurriz të saj?
Pra, a ka qenë kjo e qëllimshme dhe se këto media u përpoqën t’i shërbejnë dizenjimit të një profili të rremë të kryeministrit Rama, në pragun e çeljes së fushatës zgjedhore; një lloj paqeje me të shkuarën e trazuar të tij?
Dhe në fund, a kemi të bëjmë me një mashtrim?
Sidoqoftë, gjithçka ndodhi është një turp! Ata gënjyen dhe publiku u dezinformua! Dhe ky nuk është një mashtrim i rëndomtë!
Ky është një akt mizor, çnjerëzor, në kurriz të një individi të pambrojtur; është një triumf i palavdishëm kundrejt dikujt që ka vuajtur joproporcionalisht, jo për faj të tij, por sepse jeton në një vend ku mashtrimi, shpesh e veçanërisht, të dobëtit, të pambrojturit, gratë dhe vajzat, i mposht!
Në fund, është një histori që njollos të vërtetën, atë sublimen, të cilën media, qoftë dhe me hipokrizi e aspiron, por dikush, së paku, me emër dhe me mbiemër, duhet të kërkojë falje…
