Ish-ministri i Drejtësisë, Ylli Manjani, ka reaguar me një postim në rrjetet sociale, lidhur me deklarimet e Kryeministrit Edi Rama, por edhe të disa ambasadorëve, përsa i takon korrupsionit dhe luftës kundër tij në Shqipëri.
Manjani shkruan se sado para të bëjë një gjykatës apo prokuror, nuk i afrohet kurrë përfitimeve që krijohen nga një kontratë koncensioni, PPP, inceneratori, leje minerare, leje ndërtimi apo tenderi infrastrukture.
“Bëni konferenca sa të doni e ku të doni. Në çdo sistem politik të rruzullit, korrupsioni kërkohet tek qeveria.
Qeveria administron punë e interesa të mëdha publike. Qeveria administron paratë publike. Ndaj aty kërkohet edhe korrupsioni”, thekson Manjani.
Postimi nga Ylli Manjani
Sado para të bëjë një gjykatës apo prokuror, nuk i afrohet kurrë përfitimeve që krijohen nga një kontratë koncensioni, PPP, inceneratori (që e merr lumi pa filluar punë), leje minerare, leje ndërtimi apo tenderi infrastrukture.
Bëni konferenca sa të doni e ku të doni. Në çdo sistem politik të rruzullit, korrupsioni kërkohet tek qeveria.
Qeveria administron punë e interesa të mëdha publike.
Qeveria administron paratë publike.
Ndaj aty kërkohet edhe korrupsioni.
Aty, pra në qeveri, nuk flitet më për bakshish por për bashkpronësi interesash që vjen nga devijimi i parasë publike në xhepa privatë.
Nëse gjykatësi merr bakshish, qeveritari ndan përqindje e trafikon influencë. Ky është dallimi themelor që anashkalohet si pa gjë të keq.
“Bashkishi” nuk e lufton dot “përqindjen”, nëse kjo e fundit ka në dorë të japë bakshish dhe të emërojë bakshishaxhiun e radhës…
Qeveria (përqindja) ka qenë, është e do të jetë problemi!
Nejse, konferencë të mbarë shoqe e shokë pjesmarrës aty!
