Nga Boldnews.al
Nga 1 janari dhe në vijim pagat për mjekët dhe infermierët do të rriten me 40 %, ndërsa për mësuesit e arsimit parauniversitar 15 %. Këtë lajmëroi plot pompozitet kryeministri Edi Rama, në një konferencë ku në krahun e tij të djathtë mbante ministrin e dashur Ahmetaj dhe atë të financave dhe ekonomisë Denaj.
Edhe kjo rritje page i ngjan atyre premtimeve që kur e di që do të ikësh u jep gjithçka me fjalë, pasi prej teje nuk do të marrin asgjë, ndërsa për atë që vjen, e lë fakt të kryer dhe “tokë të djegur”… Për çdokënd që punon në sektorin e shëndetësisë, padyshim që rritja e pagës është një lajm i mirë, por vetëm kaq, duke mbetur si lajm, pasi edhe atë pagë të rritur Rilindja ta konverton me tentativën për të marrë vota.
Në nismën për të mbajtur pushtetin me çdo kusht, pikërisht kur edhe pak muaj na ndajnë nga zgjedhjet e 25 prillit, Rama dhe lugunia e tij në kabinet kanë bërë një llogari të thjesht matematikore. Në sistemin shëndetësor do të përfitojnë 18,415 punonjës, nga të cilët 4,650 mjekë dhe 13,765 infermierë, ndërsa në sistemin e arsimit parauniversitar do të përfitojnë 35,883 punonjës. Mbi 54 mijë punënjës në këta dy sektorë përfitojnë rritje page, që për Rilindjen e Ramës synohet të përkthehet edhe vota të tyre dhe familjarëve.
Përtej botës haluçinative të qeverisë dhe afrimit të një kotherje për çdo punonjës në shëndetësi dhe arsim, faktet janë edhe më të rënda se një rritje pagash për shkaqe eletorale. Në shëndetësi tenderat dhe koncesionet janë kthyer në kancerin e madh që ka shtatë vjet që agravohet. Edhe pse për një infermier paga në “letrat e Ramës” duket e kënaqshme, askush nuk e di sa para ka paguar nëndorë për atë vend pune dhe mbase do i duhen disa vite që “shtesën 40%” ta përdorë për të larë borxhet…
Nga ana tjetër, shumë nga personeli shëndetësor janë prekur nga “COVID-19”, pikërisht nga mungesa e masave të sigurisë, ku u arrit deri në atë pikë sa u shpërndanë maska të skaduara për mjekë dhe infermierë, në kulmin e pandemisë së koronavirusit. Janë tetë mjekë që u ndanë nga jeta nga “COVID-19”, ku shtatë prej tyre ishin mjekë nëpër rrethe. Kjo ka një shpjegim të frikshëm, pasi në sistemin shëndetësor parësor nëpër rrethe, mungonte dhe vazhdon të mungojë çdo masë e nevojshme për mbrojtjen nga koronavirusi. Ata jetë të humbura nuk e gëzuan asnjë ditë “pagën e rritur” nga Rama!
Ndërkohë, në sektorin e arsimit u përcaktua se nga data 1 janar i vitit të ardhshëm dhe në vijim pagat do u rriten me 15 %. Edhe kjo një lojë e ulët elektorale, ku edhe një shtesë e vogël në pagë bëhet për të të marrë votën, e më pas dinjitetin në mënyrë të përhershme. Mësuesve iu hoq paga e 13 që merrnin disa vite më parë, ndërsa aktualisht u janë shtuar orët e punës për një pjesë të tyre gati dyfish për shkak të pandemisë, por pagesat janë edhe më qesharake.
Ndërsa ende nuk është mbushur një muaj nga nisja e vitit të ri shkollor, mbi 80 mësues janë infektuar nga koronavirusi, disa prej tyre fatkeqësisht kanë humbur edhe jetën. Nëpër shkolla mungon edhe uji për të larë duart dhe jo të kërkohet higjenë e shtuar me detergjentë, apo edhe ruatje të distancës fizike.
Në disa shkolla në rrethe mësuesit janë infektuar gjatë kohës që udhëtonin nëpër furgonë, duke qëndruar kapic mbi njëri-tjetrin sepse drejtoritë arsimore në rrethe nuk vendosin aq sa është e nevojshme automjetet në dispozicion të arsimtarëve. Këto të vërteta qeveria nuk i sheh, por për të mbuluar gjithçka shkon keq u ofron një “pagë të rritur”, e cila në një dorë jepet dhe në tjetrën merret nga PPP-të, taksat e shtuara dhe pasiguria në punë që shpesh u ka kushtuar edhe jetën.
