Qeveria njoftoi një ditë më parë vendimin se duke filluar nga data 15 tetor 2020 maskat do të jenë të detyrueshme kudo, por vetëm në restorante dhe bare jo.
Por çfarë e ndryshoi mendimin e kryeministrit Edi Rama, ishte ai që nga foltorja e Kuvendit, në mars të këtij viti, deklaronte se maskat janë shpenzim i kotë pasi nuk na mbrojnë nga virusi Covid-19.
Ndërkohë dje sipas Ramës duke filluar nga dita e enjta të gjithë do të mbajmë maskë, ndryshe do penalizoheni me gjobë.
Nuk dihet se çfarë ka ndodhur, apo me kë është konsultuar Kryeministri lidhur me vendimin, i cili duket se ka shkaktuar reagime të shumta në rrjetet sociale. Gjithsesi mjekët e Infektivit apo Shefqet Ndroqit, spitalet ku kurohen të sëmurët me Covid ende nuk kanë reaguar publikisht ndaj një vendimi të tillë.
Tashmë duhet pritur nëse edhe ata kanë ndryshuar qëndrim si Kryeministri apo vijojnë t’i qëndrojnë deklarimeve të mëparshme se maska në ambientet e hapura është e kotë.
