Pas kreut demokrat, Lulzim Basha, edhe Presidenti Ilir Meta, ka sfiduar Kryeministrin Edi Rama, duke e ftuar në debat.
“Sapo i kam konfirmuar z.Blendi Fevziu gatishmërinë time për të dalë në “Opinion” me Kryeministrin në detyrë, i cili mund të marrë edhe përforcime me vete.
Transparenca e vetmja rrugë!
Dil në përballje ose largohu!”, shkruan Meta, duke iu përgjigjur një reagimi nga Kreu i Qeverisë.
Me shumë gjasë, ashtu si edhe në ftesën e Bashës për debat, Kreu i Qeverisë do të shmanget. Prej vitit 2000, Rama i është shmangur debateve publike, ndërsa përballja e parë dhe e fundit e tij me një kandidat ishte ajo me Besnik Mustafajn për Bashkinë e Tiranës, plot 20 vite më parë.
Preisdenti i vendit, Ilir Meta, në një mesazh drejtuar Asamblesë së Partisë Socialiste, si një ish-anëtar i saj, ka akuzuar kryeministrin Rama se ka marrë peng këtë parti dhe po e keqpërdor stemën e PS-së.
Po ashtu, kreu i shtetit, i është përgjigjur dhe akuzave të Ramës, i cili e deklaroi nga foltorja e Kuvendit se Meta takon në skuta katundesh subjekte të OFL-së.
Meta i kërkon kryeministrit të thotë publikisht, emrin, orën dhe vendin kur ky takim ka ndodhur, dhe ai do të japë menjëherë dorëheqjen ose në të kundërt nuk do t’i ndahet derisa të gjithë së bashku ta përzënë nga PS.
