Ish-Kryeministri Sali Berisha ka publikuar në rrjetet sociale denoncimin e një qytetari, sipas të cilit dy të rinj, të dënuar për drogë, janë emëruar në poste të administratës në Vaun e Dejës.
Referuar denoncimit, emëruar njëri prej personave është emëruar në krye të OSHEE për veriun dhe tjetri, në krye të Policisë Bashkiake të Vaut të Dejës.
“Trafiku i drogës, meritë për t’u ngritur në detyrë”, shkruan Berisha duke publikuar mesazhin.
Ish-Kryeministri thekson se “Tom Ndue Zhurri, i dënuar në vitin 2012 me 7 vite dhe 7 muaj burg, emërohet drejtor i OSHEE dhe Gjergj Dodani, i dënuar në vitin 2016 për trafik droge dhe i përjashtuar nga Policia, emërohet shef i komisariatit të Vaut të Dejës. Detyra: të mbrojnë arat me kanabis “medicinal” të Edvin Drogës dhe Gjeneral Hashashit.”
Përshëndetje Doktor. Denoncim nga Vau i Dejës.
Tom Ndue Zhurri, i cili është drejtor i OSHEE për Veriun, i dënuar në vitin 2012 për veprën penale “Prodhim dhe shitje e narkotikëve” me 7 vite e 6 muaj burg, sot është rikthyer në menaxhimin e parcelave të drogës në Vaun e Dejës, më specifikisht në Karmë, Vig-Mnel, Koman, Toplan, Sermë dhe Shllak.
Tom Zhurri, në bashkëpunim me shefin e komisariatit të Vaut të Dejës dhe Shefin e Krimeve, këto ditë kanë marrë në menaxhim parcelat e drogës në bashkinë Vau i Dejës, sepse parcelat janë në pronësi të bashkisë dhe në krye të Policisë Bashkiake është emëruar së fundmi një tjetër i dënuar në shtator të vitit 2016 për trafik droge dhe i përjashtuar nga Policia e Shtetit, krimineli Gjergj Dodani.
Trafikanti i drogës Gjergj Dodani ka vënë tani së fundmi në dispozicion të këtij rrjeti kriminal të gjitha makinat e Policisë Bashkiake, të cilat së bashku me makinat e Komisariatit, janë vënë në ruajtje të parcelave të drogës.
