Anëtari i Kryesisë së Partisë Demokratike, Enno Bozdo, përmes një interviste të dhënë në emisionin “Pasdite me Xhaxhiun” në televizionin Faxnews, është shprehur në lidhje me natyrën e elektoratit shqiptarë dhe arsyet pse lëvizja radikale e opozitës nuk ka mundur ta rrëzojë dot qeverinë Rama.
Sipas Bozdos, opozita ka bërë më të mirën e mundshme në betejën e saj me qeverinë, por siç ndodh sipas tij në të gjitha vendet e Europës juglindore mungon angazhimi qytetar.
“Zgjedhësi shqiptar preferon ta ndëshkojë qeverinë ditën e votimit, siç do të ndodhë dhe më 25 Prill”, u shpreh Bozdo.
“Së pari po të shikoni historinë politike në 30 vitet e fundit në Evropën Juglindore, duhet të kuptoni që qeveritë në raste shumë të rralla janë ndërruar me aksionin politik të një partie të vetme. Ne si Parti Demokratike kemi bërë më të mirën dhe nuk kemi bërë pak. Denoncimi nuk ka munguar kurrë nga PD, as thirrjet për të protestuar dhe bllokuar rrugët.
Ajo që na mungon është lëvizja shoqërore për t’iu bashkuar kauzës qytetare. Zgjedhësit shqiptarë nuk është se nuk i përthyejnë ato që opozita ka denoncuar, por vendosin t’ia japin ndëshkimin qeverisë ditën e zgjedhjeve, e kanë të vështirë të mendojnë alternative të tjera. Asnjëherë tjetër përveç dhjetorit 1990 dhe ’97-ës qeveria nuk është ndryshuar nga protestat sado të mëdhaja kanë qenë ato.
Nga ana tjetër qëndron një kryeministër që nuk ka cak dhe nuk ka turp. Në Evropë është morali dhe standarti i vendosur që e shtyn kryeministrin të japë dorëheqjen.
Unë personalisht kam dëshirë për një ndryshim të madh, pasi në qoftë se ndodh thjesht një rrotacion ky vend nuk do të bëhet me i jetueshëm”, tha Bozdo.
