Deutschlandfunk, radio publike gjermane, raporton se në Shqipëri është miratuar një kod zgjedhor kontrovers. Në raportim theksohet se qëllimi i kodit është bllokimi i aleancave dhe dobësimi i opozitës.
“Në Shqipëria, parlamenti miratoi një reformë të diskutueshme të ligjit zgjedhor. Në zgjedhjet parlamentare, partitë nuk do jenë më në gjendje që të krijojnë aleanca.
Sipas njoftimeve të medias, kjo do të zvogëlojë më tej shanset e partive të opozitës kundër Partisë Socialiste në pushtet.
Partia e kryeministrit Rama e ka qeverisur Shqipërinë me një shumicë absolute që prej vitit 2017. Opozita akuzon socialistët për korrupsion dhe mashtrim elektoral dhe ka bojkotuar parlamentin.
Zgjedhjet e ardhshme parlamentare do mbahen në prill të vitit që vjen”, raporton Deutschlandfunk.
Një ditë më parë, Parlamenti, me votat e PS dhe 19 deputetëve që vetëquhen si “opozita” parlamentare, miratuan ndryshimet në Kodin Zgjedhor, bazuar në një draft të propozuar kryesisht nga PS, duke ndaluar koalicionet parazgjedhore. Ky vendim ishte paralajmëruar nga Kryeministri Edi Rama, ndërsa gjithë debati ishte pëqëndruar nëse do të hapeshin ose jo listat e kandidatëve.
