Kuvendi miratoi sot ndryshimet e njëanshme në Kodin Zgjedhor, sipas një drafti të propozuar nga PS dhe disa nga deputetët e asaj që njihet si “opozita” parlamentare. Ndryshimet konsistojnë në uljen e pragut elektoral kombëtar nga 3 në 1 %, ndalimin e koalicioneve parazgjedhore me lista të përbëra, si dhe aplikimin e listave të kandidatëve, ku renditjen e përcakton Kryetari, por emrat mund të ndryshojnë në zhvendosje, nëse ndonjë nga kandidatët merr mbi 10 mijë vota.
Pro ndryshimeve në Kod, që kundërshtohen nga opozita e bashkuar, votuan 97 deputetë, 19 prej të cilëve i përkasin “opozitës” parlamentare.
Ndërkohë kundër kanë votuar deputetët Adriatik Alimadhi, Myslim Murrizi, Ralf Gjoni, Kujtim Gjuzi, Artur Roshi, Zef Shtjefni, Ambra Borova, Gjetan Gjetani, Fatjona Dhimitri, Halit Valteri, Erion Piciri, Elda Hoti.
Votimi në Kuvend u parapri nga një fjalim i Kryeministrit Edi Rama, i cili artikuloi akuza në drejtim të Presidentit, Ilir Meta, por edhe u tall me disa nga deputetët e “opozitës”.
Më parë Meta kishte paralajmëruar se do të publikonte emrat e deputetëve që do të votonin pro Kodit të ri Zgjedhor, ndërsa tha se ata do të mbanin përgjegjësi individuale.
Deklaratat e Metës u cilësuan nga Rama si shantazh që po u bëhej deputetëve.
