Napoli e ka vendosur dhe nuk do të fluturojë drejt Torinos për ndeshjen e sotme kundër Juventusit. Lega Serie A vendosi mbrëmë që ndeshje të luhej sipas planit, sonte prej orës 20:45. Gjithsesi skuadra e Gennaro Gattuso nuk do të zbresë në fushë.
Te Napoli do të respektojnë vendimin e autoritetit lokal të shëndetit, ASL, që vendosi ditën e djeshme për izolimin e futbollistëve dhe stafit të klubit italian. Në raste se Lega do të vendosë qa ta humbin ndeshjen në tavolinë, atëherë Napoli ka planifikuar ta apelojë vendimin.
Ky rast mund të krijojë probleme në futbollin italian. Më parë ka një precedent, teksa Salernitana udhëtoi drejt Verona dhe luajti kundër Chievo. kjo ndodhi edhe pse në skuadër ishte zbuluar një rast pozitiv me COVID-19. Po protokolli çfarë thotë?
Sipas tij personi që del pozitiv futet në karantinë dhe ndiqet nga ASL, kurse lojtarët e tjerë izolohen në qendrën sportive të ekipit. Ata bëjnë tamponin tjetër dhe përgjigjet duhet të dalin deri në katër orë para ndeshjes. Ata që dalin negativë dalin dhe luajnë, pastaj kthehen në izolim. Për 14 ditë mund të dalin vetëm për stërvitje dhe për ndeshje.
SKENARI TJETËR – Gjithsesi mund të ndodhë edhe ndryshe dhe ndeshja të shtyhet. Kështu është shprehur këshilltari i Federatës Italiane të Futbollit (FIGC) për radio “Kiss Kiss Napoli”. “Ndeshja do të shtyhet. Po shkojmë drejt kësaj rruge. Vendimi qarkullues i 2 tetorit nga Lega Calcio flet qartë. Dispozita e ASL është e ligjshme, rregulli është i qartë”.
