Nga Boldnews.al
Ministrja e Jashtme e Kosovës, Meliza Haradinaj-Stublla e zhveshi “shpatën orale” duke ngritur shqetësimin se në Luginën e Preshevës po ndodhin shpopullime me qëllime politike dhe mirëfilltas etnike nga ana e serbisë. Qytetarët atje po largohen pikërisht nga një lloj represioni dhe mungesë të të drejtave apo investimeve. Nuk mjaftoi vetëm me kaq, por u shtri edhe në Mal të Zi, duke u shprehur se edhe atje vuajnë njësoj shqiptarët. Këtë deklaratë ministrja e bëri në mbledhjen e dy qeverive Shqipëri-Kosovë, e cila po mbahet me shumë pompozitet në Pallatin e Kongreseve në Tiranë.
“Fjalët e arta” i dëgjoi edhe kryeministri shqiptar Edi Rama dhe ai i Kosovës Avdullah Hoti. Dikush tundte kryet me aprovim, të tjerë as që e kishin mendjen kur ajo fliste. Fajin ia vendosën “shkjaut” për ikjen dhe shpopullimin e shqiptarëve që jetojnë nën Serbi apo Mal të Zi, por vetë këta drejtues politik çfarë u kanë bërë dy vendeve?
Në qeverisjen Rama ka një rekord të zi, mbi 400 mijë shqiptarë janë larguar jashtë vendit në kërkim të azilit dhe u dergjën nëpër kampet e emingrantëve të luftës ku ndodheshin sirianë, afganë dhe afrikanë.
Ikën nga pasiguria, mungesa e punës, varfëria, arroganca e pushtetit, korrupsioni i tmerrshëm, dhe mungesa e drejtësisë. Morën udhën pa ditur çfarë i priste, mbanin radhën për një pjatë supë me fëmijët e uritur e të pashpresë përdore, flinin në kapanone mes mijëra emigrantëve të tjerë dhe në fund përballeshin me dëbimin.
Për kryeministrin tonë këto ikje ishin mëse normale, duke bërë lajthitje justifikimesh se kështu ndodh edhe në vendet brenda Bashkimit Europian. Kinse jepte e merrte shifra se edhe vetë brenda shteteve të BE-së ka lëvizje njerëzish, por nuk përmendte se ata shkojnë me punë, me kontrata të rregullta, me banesa të siguruara, ndërsa shqiptarët si emigrantë fatkeqë, ku për ti shpëtuar dëbimeve flinin nën urat e europës dhe lundronin në internet me mall për shqipërinë, por shihnin sërish vetëm fytyrën e kryeministrit dhe ministrave që flisnin për një Shqipëri surreale dhe projekte të mëdha në imagjinatë.
Edhe në Kosovë është po i njëti hall. Shumë qytetarë kanë ikur dhe po ikin. Pikërisht nga një klasë politike e cila hajninë e ka kthyer në art, ndërsa konfiltin artificial si një formë për të mbajtur pushtetin. Janë po të njëjtët fytyra që kridhen pas karriges së postit, janë për të njëjtit njerëz që thurin kulisa dhe në fund detyrojnë qytetarët e tyre të ikin në emigrim, për një jetë tjetër më të mirë dhe shpresën se të paktën fëmijët e tyre do të integrohen.
Po për keqeverisjen, korrupsionin, kapjen e çdo pushteti, shkeljen e lirive dhe të drejtave të qytetarëve, pabarazinë e madhe sociale, akoma “shkjau” ua ka fajin? As ministresha e Kosovës Melizë dhe as ministresha shqiptare Elisë nuk i shihin sa shqiptarë detyruan të largohen në emigrim dhe të pashpresë.
E kanë të vështirë të shohin përtej parfumit të shtrenjtë që lagin qafën, veshjes së tyre, flokëve të kredhura në parukeri dhe llogarive të personale bankare. Për Melizën le të rrojë Hoti i saj, për Elisën le të rrojë gjatë në politikë Rama që në botën e saj të çudirave i përngjan Skënderbeut.
