Një e moshuar është filmuar e shtrirë në mes të rrugës në dukje, në gjendje të rëndë shëndetësore. Pamjet dramatike janë postuar në rrjetet sociale nga Jolio Dine, përfaqësues i PD-së në Sarandë.
Ai sqaron se pamjet i janë dërguar këtë të Hënë dhe janë filmuar në Piqeras, ndërsa e moshuara që shihet në video quhet Elefteri, një endacake nga Saranda.
Pas publikimit në rrjetet sociale të pamjeve të të moshuarës dhe mjerimit me të cilin jetonte, lidhur me të foli më 19 Shtator Ministrja e Shëndetësisë Ogerta Manastirliu. Ajo postoi në faqen e saj në FB një foto të moshuarës nga një shtrat spitali, teksa njoftonte se ishte ndihmuar nga strukturat e shërbimit social-shëndetësor.
“Pasi u ndihmua nga strukturat tona të shërbimit socio-shëndetësor në Sarandë, nënë Elefteria, e moshuara e braktisur nga familja, është trajtuar me kujdes nga ekipi i mjekëve kirurgë të spitalit të Traumës. Gjithçka ka shkuar mirë dhe operacioni është realizuar me sukses”, shprehej Manastirliu.
“Më gëzuan pa masë fjalët e saj për stafin e përkushtuar që i shpëtoi jetën, sapo të jetë gati të lërë spitalin, do të kujdesemi për një strehë të sigurt për të moshuarën e vetmuar”, shkruante ajo në postimin në rrjetin social.
Por, mesa duket, pas daljes nga spitali, e moshuara e ka gjetur serish veten në rrugë dhe jo “në një strehë të sigurt”, siç shprehej ministrja.
Jolio Dine, në komentin që shoqëron pamjet, shprehet se deklarata e Manastirliut ishte propagandë dhe e quan ngjarjen të turpshme.
