Vetëm një ditë pasi konfirmoi se do të kandidojë si deputet sërish në Vlorë, kryeministri Edi Rama ka mbledhur në një takim pasditen e sotme drejtuesit e institucioneve të qarkut të Vlorës.
Burime nga takimi bëjnë me dije se porosia e Ramës ka qenë e qartë: Nuk duhet ketë qytetarë të pakënaqur!
Në funksion të këtij qëllimi, ai ka kërkuar impenjim maksimal për të zgjidhur çdo problem të qytetarëve.
Largimin e tij nga Durrësi dhe garimin sërish në Vlorë Rama e njoftoi dje në prezantimin e projektit “Parku i Shtëpisë së Pavarësisë”.
“Unë në Vlorë kam qenë edhe përpara se të bëhesha kryetar i PS, edhe kur i bëra dhe jam tani. Në Vlorë do jem edhe po të mos jem kryeministër, se do kem më pak angazhime.”
Ai shtoi se me qytetin e Vlorës e lidh “fati, historia e familjes dhe dashuria për këtë bukuri të pazbuluar”.
