Partia Demokratike deklaroi sot se çmimi i ujit në Tiranë është më i shtrenjtë se në Korçë e Pogradec. Enno Bozdo, zyrtar i PD-së, tha sot se Kryebashkiaku Erjon Veliaj deklaroi publikisht se çmimi i furnizimit me ujë i Tiranës është më i lirë se ai i Korçës dhe Pogradecit dhe se ai do të jepte dorëheqjen nëqoftë se këto fakte nuk qëndronin.
“Asgjë nga kjo deklaratë publike nuk është e vërtetë. Qytetarët e Tiranës në fakt paguajnë shumë më tepër se ata të Pogradecit dhe Korçës.
Të dhënat më poshtë janë marrë nga Raporti zyrtar vjetor i Entit Rregullator të Ujit:
-UK Tiranë: çmimi është 65 lek/m3 për familjarët, koha e furnizimit me ujë është 10.10 orë në ditë dhe subvencione të marra nga qeveria janë 160,641,000 lekë.
-UK Korça: çmimi është 72 lek/m3 për familjarët, koha e furnizimit me ujë është 23.5 orë në ditë dhe subvencione të marra nga qeveria janë 20,436,000 lekë.
-UK Pogradec: çmimi është 62 lek/m3 për familjarët, koha e furnizimit me ujë është 21 orë në ditë dhe subvencione të marra nga qeveria jane 13,624,000 lekë”, shkruan Bozdo.
Sipas tij, qytetarët e Tiranës edhe pse paguajne sa 90% të çmimit të Korçës, furnizohen vetëm 10.10 orë në ditë kur qytetarët e Korçës marrin gati 24 orë ujë në ditë.
“Kjo është e vërteta në fakt për gjithçka që ndodh në Tiranë, sepse nën drejtimin e Erjon Veliajt, Tirana është qyteti më i shtrenjtë në rajon, më i ndoturi, me trafikun më të rënduar dhe me dëndësinë më të madhe të ndërtimeve. Është qyteti më problematik për të bërë biznes në rajon, dhe më jomiqësori ndaj biznesit duke patur taksat më të larta.
Qytetarët e Tiranës i dinë mirë këto fakte, pavarësisht kësaj propagande të neveritshme”, shprehet Bozdo.
