Larg vëmendjes së opinionit publik, mazhoranca ka nisur punën që në gusht për të amenduar të ashtuquajturën paketa anti-shpifje, pas shqetësimeve të Këshillit të Europës dhe vërejtjeve të Komisionit të Venecias.
Ndryshimet u janë besuar deputeteve Mirela Kumbaro dhe Klotilda Bushka, të cilat nuk iu përgjigjën interesit të A2 për të sqaruar ndërhyrjet që po hartojnë në draft. Burime të tjera nga mazhoranca socialiste pohuan se ligji po punohet në bashkëpunim me ekspertë të BE dhe KE dhe se nuk ka një afat se kur do përmbyllet pasi kërkohet që në finale dokumenti te jetë i dakordësuar me të gjithë aktorët.
Këtë pretendim duket se e rrëzojnë vetë reagimet e shqetësuara të pak ditëve më parë të ambasadorit të BE-së, Luigi Soreca, që kërkonte të respektohet opinion i Venecias, si dhe Këshillit të Europës, që kërkoi një rishkrim nga e para të ligjit. Edhe vetë njerëzit e medias duket se janë lënë në terr deri tani.
Përmes komunikimeve jozyrtare, ata kanë mësuar se ndryshimet që duan të bëjnë socialistët synojnë të reflektojnë ndryshimet e Presidentit dhe jo të Venecias. “Kemi të bëjmë me një përpjekje të radhës të shumicës socialiste për të miratuar një ligj jashtë standardeve duke përdorur artifica juridike. Artifica juridike në këtë rast është dekreti i Presidentit për të rikthyer ligjin për rishqyrtim parlamentar. Ky dekret i jep mundësi shumicës ta rrëzojë ose të bëjë disa ndryshime. Ndryshimet në këtë rast, duke qenë se kemi një instrument më të rëndësishëm se dekreti i Presidentit, siç është Venecias, janë të pamjaftueshme dhe të kufizuara”, thotë gazetari Gjergj Erebara.
Arnimet në paketën fillestare shqetësojnë edhe Komitetin Shqiptar të Helsinkit. “Komiteti Shqiptar i Helsinkit i është bashkuar shqetësimit të gazetarëve dhe organizatave të medias se nuk mund të ketë rishikim të një paketë të propozuar që është difektoze dhe ka mangësi si nga pikëpamja e të drejtave dhe garancive proceduriale sa i takon ushtrimit të lirisë së shprehjes, por edhe të drejtës për proces të rregullt për ata njerëz të medias që mund të ketë ankesa për shpifje”, thotë Erida Skëndaj, drejtore e Komitetit Shqiptar të Helsinkit.
Duke iu referuar Venecias, Erebara dhe Skëndaj renditin të drejtat që i jepen Autoritetit të Medias Audiovizive si një nga problematikat kryesore të ligjit. AMA, me anë të Këshillit të Ankesave, do të marrë në shqyrtim ankesat dhe sipas Venecias ka rezerva dhe refleksione të forta lidhur me nevojën për të fuqizuar pavarësinë.
“Nuk është momenti i duhur të rishikohet ky ligj, për sa kohë kemi probleme me pavarësinë efektive të institucioneve të pavarura”, thotë Skëndaj.
“AMA-n e kemi të varur nga partitë politike. Kjo nuk është mënyra si duhet të veprojnë institucionet e pavarura”, thotë Erebara.
Komisioni i Venecias, në raportin final, e cilësoi të pazbatueshëm ligjin aktual të medias, duke ngritur shqetësim veçanërisht për kompetencat e shtuara që kthejnë AMA-n gati në një gjykatë, ndërkohë që nuk është e garantuar pavarësia e këtij organizmi. /A2/
