Kryetari i Grupit Parlamentar socialist, Taulant Balla, u shpreh sot se në zgjedhjet parlamentare të 25 prillit do të aplikohen listat 100 % të hapura të kandidatëve, duke shtuar se modeli i propozuar nga PS është i ngjashëm me atë të aplikuar si në Kroaci, Austri, Belgjikë, Danimarkë dhe Republika Çeke.
I pyetur nëse do të miratojnë në mënyrë të njëanshme ndryshimet në Kodin Zgjedhor të propozuar nga PS nëse nuk ka një propozim nga opozita e bashkuar, Balla tha se nuk beson që PD do të përjashtohet nga ky proces.
“Listat e Hapura tashmë janë fakt i pakthyeshëm mbrapsht. Kushtetuta ka përcaktuar qartë që më 25 prill qytetarët do të shprehin vlerësimin dhe të japin votën e tyre jo vetëm për partinë, por dhe një prej kandidatëve në një prej listës së subjekteve.
PS ka propozuar një draft që është bërë publik nga Gjiknuri. Është diskutuar dhe në grupin parlamentar, përveç pjesës së diskutimit në Këshill, dhe inkurajojmë ku janë dhe subjekte jashtë-parlamentare, të gjehet gjuha e përbashkët për kthimin si duhet të amendamenteve.
Ne e inkurajojmë Këshillin Politik me qëllim që do të gjejmë gjuhën e përbashkët në përkthimin si duhet të ndryshimeve të miratuar në Kushtetutë në Kodin Zgjedhor. Nga opozita parlamentare ose nga një deputete janë bërë disa propozime nga ana e tyre. Unë shpresoj se dhe nga ana e opozitës jo parlamentare, të kemi mundësinë që të vazhdojmë diskutimin me ta dhe partitë e tjera”, tha Balla.
I pyetur lidhur me votat që duhet të marrë një kandidat për të qenë deputet, Balla tha se këtë formulë nuk e kemi shpikur ne, por e kanë pjesa më e madhe e vendeve.
“Kemi menduar që përzgjedhja më e mirë ose modeli më i mirë janë vendet që listova më lart. Pa dyshim ka këndvështrime që mund të zgjidhet modeli i Kosovës, lista ose renditja ndryshon në varësi të votave që merr një deputet”, tha Balla.
