Oficerët e Policisë Gjyqësore kanë marrë në pyetje Preng Gjinin. Ndonëse në gjendje jo të mirë shëndetësore, pas ndërhyrjeve, Gjini ka treguar të gjitha lëvizjet që ka kryer ditën e atentatit.
Gjini është shprehur se nuk ka asnjë hasmëri me persona të tjerë, duke iu referuar kryesisht fisit Reçi.
Sa i takon vrasjes së vëllait të tij në Rrëshen, ngjarje kjo e ndodhur rreth një vit më parë, Gjini ka treguar se ai nuk mban përgjegjësi për veprimet e tij.
“Më kanë vrarë vëllanë por nuk mbaj përgjegjësi për veprimet e tij. Gjatë ditës së atentatit nuk kam parë asgjë të dyshimtë, makinën ja merrja shpesh kushëririt pasi shkoja shumë mirë me të”, është shprehur mes të tjerave Preng Gjini.
50-vjeçari ka thënë më tej se ai lëviz gjithnjë i vetëm dhe nuk ruhet nga askush, pasi nuk ka pasur asnjë lloj frike për jetën e tij. E megjithë, pretendimet e Prengës, ajo që tashmë është fakt, është se nga përplasja mes familjes së tij dhe familjes Reçi në Mirditë kanë humbur jetën 5 persona, dhe se ai vetë nuk ka sesi qendron totalisht jashtë kësaj.
Dëshmia e Gjinit duket se nuk ka ndihmuar hetuesit në përparimin e zbardhjes së kësaj ngjarje, që duket se do t’i shtohet dosjeve të pazbardhura të krimeve në vendin tonë.
