Nga BoldNews.al
Fatmir Xhafaj e ka pasur të qartë se “çorba” që ai gatoi me Reformën në Drejtësi nuk i jepte hapësirë kolegëve të tij në Partinë Socialiste për të shkarkuar nga detyra presidentin Ilir Meta.
Në një intervistë të gjatë për “Tema”, Xhafaj, një ish-hetues komunizmi dhe që tashmë “përkëdhelet” kur e konsiderojnë si “babai i drejtësisë së re”, rrëfen se ka qenë skeptik për Komisionin Hetimor Parlamentar kundër Metës.
“Në vlerësimin tim, Komisioni nuk duhej të ngrihej fare. Jo se nuk kishte shkaqe për një gjykim të tillë, por sepse me një analizë ligjore të thjeshtë, ishte gati i pamundur shkarkimi i Presidentit”, thotë Xhafaj.
Sipas tij, “u konsumuan energji politike dhe institucionale për një motiv të justifikuar, por të pamundshëm ligjërisht dhe procedurialisht për t’u realizuar”.
Xhafaj e dinte shumë mirë se një vendim i mundshëm i Parlamentit një-ngjyrësh për shkarkimin e Presidentit, duhet domosdoshmërisht që të konfirmohej nga Gjykata Kushtetuese.
Por kjo e fundit është jo-funksionale prej rreth 3 vitesh, për shkak të reformës së rrëmujshme në drejtësi, për të cilën, pikërisht Fatmir Xhafaj ka përgjegjësinë më të madhe.
Xhafaj u vendos në krye të Komisionit të Posaçëm të Reformës në Drejtësi dhe shpërdoroi maksimalisht nevojën e qytetarëve shqiptarë për një drejtësi të re, duke ia dorëzuar gjyqësorin qeverisë së Edi Ramës.
Pas këtij “shërbimi”, Rama e emëroi Ministër të Brendshëm, si edhe e toleroi politikisht kur Agron (Geron) Xhafaj, vëllai trafikant i Fatmir Xhafajt, u dorëzua tek autoritetet italiane për të vuajtur një dënim prej 7 vitesh e 6 muaj burgim, si pjesë e një organizate kriminale.
Por, Rama nuk e toleroi Xhafën, kur ky i fundit, në cilësinë e Ministrit të Brendshëm, synoi arrestimin e disa “miqve politikë” të kryeministrit, përfshirë ish-kryetarin e Bashkisë së Durrësit, Vangjush Dako.
Rama, me shumë mundësi, e kuptoi se “produkti” i Fatmir Xhafës, pra “ drejtësia e re”, tashmë ishte në duart e tij si kryeministër dhe kryetar partie.
Dhe, pikërisht, në këtë moment, Ramës nuk i duhej më Fatmir Xhafaj, të cilin e shkarkoi me një “cicërimë” (tweet) nga posti i Ministrit të Brendshëm.
Xhafaj, megjithëse është detyruar të tërhiqet shumë nga jeta aktive politike, shfaqet herë pas here për të dhënë komente mbi institucionet e reja të drejtësi.
Por, nuk kanë munguar edhe servilosjet ndaj Edi Ramës, i cili e përzuri politikisht në mënyrën më të shëmtuar të mundshme.
“Jam shumë i bindur se Partia Socialiste dhe Edi Rama si kryetar i saj duhet votëbesuar për një mandat të tretë qeverisës”, thotë Xhafaj në intervistën për “Tema”.
