Kukësi ka nënshkruar me portierin Entonjo Elezaj, i cili do të jetë nën urdhrat e trajnerit Skënder Gega dhe do rivalizojë me Dashamir Xhikën për një vend titullari.
Shqiptari është produkt i Juventusit, pasi ka luajtur me moshat e bardhezinjve të Torinos në të shkuarën.
Më pas ka kaluar te Pro Vercelli dhe Sliema Ëandereres në Maltë. Vjet ishte pjesë e këtyre të fundit, duke u aktivizuar në 7 ndeshje si titullar. Elezaj ka provuar të luajë edhe në Serie B, me Perugia, në sezonin 2016/17, në dy takime.
Njoftimi i klubit të Kukësit:
– “Entonjo Elezaj është zyrtarisht futbollist i Kukësit! Portieri 24-vjeçar ka firmosur sot me skuadrën tonë kontratën për sezonin e ardhshëm. Gardiani ka luajtur për shumë vite në kampionatin italian, por edhe në Maltë. Në të shkuarën, ai ka luajtur me ekipin e Juventus U23, teksa është edhe prodhim i kësaj akademie.
Elezaj ka firmosur sot kontratën 1 vjeçare me mundësi rinovimi edhe për një sezon, duke u bërë kështu futbollisti më i ri i skuadrës sonë. Elezaj do të bashkohet sot me skuadrën dhe do të zhvillojë stërvitjen e parë”.
