Deputetja Rudina Hajdari paralajmërooi pak javë më parë krijimin e një partie të re politike, por pa dhënë shumë detaje.
Pak ditë pas deklaratave të saj, dy deputetë të tjerë, Myslim Murrizi dhe Halit Valteri publikuan logon e partisë së tyre të re, që quhet Lëvizja Demokratike e Shqipërisë.
Fillimisht u mendua se Hajdari do të ishte pjesë e kësaj partie, por duket se deputetja që nuk dorëzoi mandatin do të krijojë një tjetër subjekt. Për këtë, thuhet se ajo do të bashkohet me nismën “Thurje”.
“Do të krijoj një parti të re, por jo me Myslim Murrizin. Kemi nisur mbledhjen e firmave për t’u regjistruar zyrtarisht. Ditët në vazhdim presim takime nëpër rrethe”, shprehet ajo për Report TV.
Ende nuk dihet se si do të quhet partia, pjesë e së cilës do të jetë Hajdari, sikundër nuk dihet nëse ajo do të mbështetet edhe nga deputetë të tjerë të asaj që njihet si “opozita parlamentare”.
