Prej më shumë se një muaji, Partizani, pret përgjigjen për anulimin e vendimeve prapavepruese të dënimit që FIFA ka dhënë për çështjen “Çinari”.
Në fillim të procesit të apelimit “demat” ishin optimistë se përgjigjja, cilado të ishte, pozitive apo negative, do të mbërrinte në mes të gushtit.
Por gushti kaloi dhe tashmë vonesa po kthehet në një problem serioz për klubin, vonesë e cila ndikon direkt në punën për ndërtimin dhe përgatitjen e dy skuadrave, Partizani dhe Partizani B, për sezonin e ri.
48 orët e ardhshme mund të jenë vendimtare, pasi shpresohet që të marrë fund ankthi i pritjes. Nëse të kuqtë marrin lajme pozitive, gjë e cila u jep mundësi të bëjnë përforcime, Partizani ka mundësi të rikuperojë mangësitë që shfaqën në sezonin e fundit që rezultoi një dështim për të kuqtë.
