Është mbyllur me gola dita e parë e ndeshjeve të javës së 6-të të Kampionatit të Kategorisë Superiore.
Pas barazimit të Vllaznisë me Luftëtarin, që çeli javën e 6-të, u luajtën mbrëmjen e të mërkurës ndeshjet Korabi-Tirana 0-1, Flamurtari-Kukësi 1-1 dhe Skënderbeu-Teuta 1-0.
Si Tirana, ashtu edhe Skënderbeu kanë fituar në minutat shtesë, respektivisht në të 91’ dhe të 95’, me anë të dy futbollistëve të rikthyer në ekipe, Muzakës dhe Nimagës, për të krijuar një atmosferë ekstreme festive për të dyja këto skuadra.
Nga ana tjetër, Flamurtari, ndonëse dominues ndaj Kukësit, duke kaluar i pari në avantazh, me 10 futbollistë për më shumë se 60 minuta, pas daljes së Pashaj me të kuq, u ndëshkua nga Pejiç, në gabimin e vetëm. Rezultate këto që ndalin në vend Teutën dhe Flamurtarin që janë në vendet e fundit të klasifikimit, ndërkohë që Skënderbeu dhe Tirana dhe Kukësi ruajnë pozitat kryesuese.
