Barcelona i dha fund aventurës në Ligën e Kampionëve, në mënyrën më të turpshme të mundshme duke u shkatërruar me rezultatin 8-2 përballë Bayern Munich.
Messi me shokë ishin inekzistent në fushën e lojës duke u dorëzuar plotësisht përballë presingut asfiksues që ushtronin kampionët gjermanë, të cilët arritën të shënojnë nga 4 gola për çdo pjesë loje dhe të marrin një fitore që do të mbetet në historinë e futbollit.
Në përfundim të ndeshjes, presidenti i katalanëve Joseph Bartomeu u shfaq mjaft i zhgënjyer dhe u kërkoi ndjesë tifozëve, ndërsa pranoi se tani është koha për ndryshime dhe se disa vendime të rëndësishme janë marrë.
“Duhet t’u kërkojmë ndjesë tifozëve tanë për këtë humbje të rëndë. U shpërfytyruam totalisht dhe ashtu si Pique, mendoj se është koha për vendime të rëndësishme. Disa i kemi marrë tashmë dhe do t’i bëjmë publike në ditët në vijim”, tha Bartomeu.
