Nga Boldnews.al
Kryeministri Edi Rama dhe deputeti Tom Doshi kanë një histori të gjatë miqësie dhe armiqësie.
Kryeministri ka një lloj dobësie ndaj atyre që cilësohen si njerëz “të fortë” dhe në këtë mënyrë ai kishte një lloj varësie ndaj deputetit rebel Doshi.
Miqësia mes tyre mori fund para një viti, ku Partia Socialiste e përjashtoi Doshin nga grupi i saj parlamentar.
Këtë përjashtim në atë kohë Ben Blushi e cilësoi kështu: “Është historia e dy shokëve të ngushtë që u zunë për arsye që s’duan të na i thonë dhe as duam ti marrim vesh”.
Por dy shokët janë rikthyer sërish bashkë.
Ditën e sotme Rama dhe Doshi janë parë përkrah njëri-tjetrit në aeroportin ndërkombëtar të Rinasit, duke pritur Dom Ernest Troshanin, i cili dy ditë më parë u shpall kardinal nga Papa Françesku.
Kryeministri Rama kishte bërë edhe Tom Doshin pjesë të delegacionit zyrtar që do të priste në Rinas kardinalit Dom Ernest Troshani.
Pas përjashtimit, deputeti Doshi pati deklaruar se do të trondiste themelet e qeverisë, duke e akuzuar Ramën se ishte mosmirënjohës, bukëshkelur dhe si qenia më e keqe që kishte njohur.
Ndërsa kryeministri Rama nga ana e tij pati deklaruar se Doshi nuk do të kishte më vend në PS.
Megjithatë, siç u pa sot nga videoja, akuzat mes tyre janë harruar.
Duke ditur se si kryeministri Rama e kuron imazhin e tij mediatik, dalja së bashku e Ramës me Doshin ka qenë e kalkuluar mirë duke i dhënë një mesazh të qartë Ilir Metës.
Deputeti Tom Doshi hodhi akuza të rënda ndaj kreut të LSI-së, aq sa arriti ta akuzonte se kishte planifikuar dhe vrasjen e tij. Një akuzë që tronditi opinionin publik, por edhe koalicionin qeveritar.
Kryeministri i vënë mes Doshit dhe Metës, zgjodhi aleancën me kreun e LSI-së, duke përjashtuar nga PS deputetin Doshi.
Por pas një viti shumë faktorë kanë ndryshuar. Marrëdhëniet mes Ramës dhe Metën kanë pasur shumë konflikte që kulmuan me reformën në drejtësi dhe që pasuan me zgjedhjet në Dibër, ku PS bëri fushatë vetëm me PDIU-në.
Nga ana tjetër kreu i LSI-së ende nuk ka konfirmuar koalicionin e ri me Partinë Socialiste për zgjedhjet e ardhshme, ndërsa PD ka bërë një bërë “pakt të heshtur” duke mos e sulmuar më kreun e LSI-së, duke shpresuar që ky i fundit të bëjë një koalicion tjetër me demokratët.
Dhe nga këtu afrimi me Doshin, por edhe me Idrizin, janë sinjale të Ramës drejt Metës, që PS mund të dalë në zgjedhje edhe pa LSI-në në koalicion.
Si do të pritet ky afrim nga Ilir Meta do të shihet në ditët në vijim, por Rama është duke luajtur me shumë porta.
Sido që të jetë marrëdhënia me LSI, ai po mundohet të jetë i përgatitur të dalë edhe i vetëm në zgjedhje duke afruar çdo zë që do të minimizonte efektin e largimit të LSI-së.
