Mëngjesin e sotëm të gjitha televizionet informative e nisën punën me situatën e përmbytjeve nga reshjet e shiut në Laç, duke bërë edhe lidhje telefonike direkte me ministrin e Bujqësisë, Edmond Panariti, që siç raportonin mediat ndodhej pikërisht në zonat me probleme.
Kështu, rreth orës 8 e gjysmë, ndërsa televizioni Report tv jepte live bisedën telefonike me ministrin Panariti nga Laçi, ai ishte duke pirë kafen e mëngjesit me bashkëshorten e tij në një lokal përballë maternitetit “Koço Gliozheni”.
Këtë shfaqje të Panaritit në media qytetarët që e shihnin vetë ministrin në kafen përballë dhe televizionin Report tv që thoshte se ai ishte në Laç, e kanë quajtur mashtruese.
Bold news ka fotografuar ministrin Panariti duke dalë nga lokali rreth orës 9:00 për t’iu drejtuar makinës së tij zyrtare të punës. Sapo ka hipur në makinë, Panariti bëri përsëri një bisedë telefonike direkte për situatën e përmbytjeve me një tjetër televizion informativ.
Me këtë rast, ministri Panariti tregoi më së miri së më shumë punë paska për të menaxhuar lidhjet e tij telefonike me median se sa për të parë nga afër situatën e përmbytjeve, ku është regjistruar edhe viktima e parë. Që prej pasdites së djeshme qyteti i Laçit dhe zonat përreth tij janë përfshirë nga reshje të dendura shiu që kanë krijuar përmbytje të mëdha.
Viktima e parë e përmbytjeve ishte një 48-vjeçar, i cili duke shkuar për në banesën e tij mbrëmjen e shkuar është rrëmbyer nga vërshimi i ujit. Ngjarja ka ndodhur në një zonë pranë qendrës së qytetit të Laçit dhe sipas policisë ajo ishte aksidentale si pasojë e mbytjes së 48-vjeçarit në ujë.
Deri tani në zonën e Laçit janë përmbytur 50 banesa, ndërsa në Milot janë evakuuar 6 familje të rrezikuara nga përmbytjet. Për të përballuar situatën nga reshjet e shiut në Laç janë angazhuar forcat policore të Komisariatit të Kurbinit në bashkëpunim me grupe të FNSH Shkodër me qëllim evakuimin e banorëve ose për çdo rast tjetër nevojë.
(Boldnews.al)
