Policia ka mundur të arrestojë një 33-vjeçar, si autorin e dyshuar të vrasjes së shtetasit Gëzim Saraçi, 57 vjeç, ngjarje e ndodhur në Gjirokastër .
I arrestuari është shtetasi Mihal Thimjo, 33-vjeç nga fshati Derviçan i Gjirokastrës.
Nga raportimet mësohet se ai është arrestuar gjatë orëve të natës, teksa ishte duke udhëtuar me makinën e tij.
Viktima u gjet i pajetë në orët e pasdites së djeshme në një automjet kamionçinë me të cilën dyshohet se po udhëtonte bashkë me autorin.
Mes tyre mësohet të ketë ndodhur një konflikt i çastit dhe më pas autori e ka qëlluar Saraçin me mjete të forta, duke i shkaktuar vdekjen.
Nga raportimet mësohet se para ngjarjes, viktima Gëzim Saraçi dhe Mihal Thimjo, që kishin njohje të vjetër familjare mes tyre, kishin qenë për një drekë në Poliçan të Zagorisë, ku duket se marrëdhëniet mes tyre ka marë një kthesë tragjike.
Një ditë më parë policia njoftoi se si rezultat i veprimeve të shpejta hetimore Policia ka arritur të identifikoje autorin e ngjarjes dhe vijon punën për kapjen e tij.
Për arsye hetimore si dhe për mprehtësinë e ngjarjes, policia nuk bëri të ditura të dhënat e autorit pa dalë grupi hetimor në konkluzionin përfundimtar e të bazuar në prova ligjore si dhe pa prangosur autorin e dyshuar.
Njoftimi:
Zbardhet në kohë rekord ngjarja e ndodhur në datën 05.08.2020, në aksin rrugor Poliçan-Suhë, ku u gjet i pajetë 57-vjeçari G. S.
Pas 6 orë kërkimesh dhe kontrollesh në të gjithë zonën u bë i mundur lokalizimi, kapja dhe prangosja e autorit të dyshuar të vrasjes.
Policia gjeti dhe sekuestroi në një banesë tjetër edhe rrobat që autori kishte veshur gjatë kryerjes së krimit.
Menjëherë pas marrjes së njoftimit se në aksin Poliçan-Suhë ishte gjetur i pajetë shtetasi G. S., strukturat e Drejtorisë Vendore të Policisë Gjirokastër organizuan punën për zbardhjen e ngjarjes.
Falë punës së mirorganizuar hetimore të kryer nga Sektori për Hetimin e Krimeve të Rënda në DVP Gjirokastër, në bashkëpunim me Prokurorinë e Rrethit Gjyqësor Gjirokastër, u bë e mundur zbardhja e ngjarjes dhe identifikimi i autorit.
Rreth 50 forca policore, pas 6 orë kërkimesh, krehje të zonës, kontrolleve në disa ambiente dhe banesa të dyshuara dhe falë përdorimit të metodave proaktive, bënë të mundur lokalizimin e vendndodhjes së autorit, kapjen dhe shoqërimin e tij në ambientet e Drejtorisë Vendore të Policisë.
Në përfundim të veprimeve të para hetimore të kryera, u bë arrestimi në flagrancë i shtetasit M. Th., 33 vjeç, banues në Dervician, për veprën penale “Vrasja me dashje”, pasi gjatë një konflikti për motive të dobëta, ka goditur me sende të forta shtetasin G. S., 57 vjeç, banues në Humelicë, Gjirokastër, duke i shkaktuar vdekjen.
Materialet i kaluan Prokurorisë pranë Rrethit Gjyqësor Gjirokastër, për veprime të mëtejshme.
