Komisioni Europian shpreh keqardhjen që nuk ishte përcaktuar më shumë kohë në fazën përgatitore për kalimin e ndryshimeve Kushtetuese me konsensusin e të gjitha palëve.
Ana Pisonero, zëdhënësja e Komisionit Europian për Partneritet Ndërkombëtar, Fqinjësi dhe Zgjerim, në një postim në twitter shkuan se “ndërsa njohim miratimin nga Parlamenti Shqiptar të disa ndryshimeve në Kushtetutë në lidhje me sistemin zgjedhor, është për të ardhur keq që nuk iu la mjaftueshëm kohë gjatë fazës përgatitore për të gjetur një kompromis me të gjitha partitë në kuadrin e Këshillit Politik”.
Ajo thotë se ndryshimet në Kodin Zgjedhor, të miratuara nga Parlamenti më 23 korrik, për të zbatuar marrëveshjen e 5 qershorit, bazuar në rekomandimet e OSBE / ODIHR-it, e kanë përmbushur kushtin e përcaktuar nga Këshilli kur vendosi të hapë negociatat e anëtarësimit në mars.
Për KE, tani është thelbësore që ndryshimet e nevojshme në Kodin Zgjedhor për zbatimin e ndryshimeve kushtetuese, me referencë të veçantë te listat e hapura dhe rolin e koalicioneve parazgjedhore, të diskutohen siç duhet me të gjithë aktorët politikë, në Këshillin Politik, në një mënyrë bashkëpunuese dhe gjithëpërfshirëse përpara se të votohen në Parlament.
Kuvendi i Shqipërisë miratoi sot ndryshimet Kushtetuese me 106 vota pro dhe 10 kundër.
Nga ana tjetër 6 deputetë nuk morën pjesë në votim, tre për arsye shëndetësore. Në seancën e sotme ishin të pranishëm 116 deputetë.
