Presidenti Ilir Meta u shpreh sot se kreu demokrat, Lulzim Basha, tregoi lidership me propozimin për hapjen e listave 100 %, duke shlyer një gabim të PD-së vite më parë lidhur me mbylljen e listave të kandidatëve për deputet.
I pyetur për qëndrimin e Kryeministrit Edi Rama, Presidenti tha se nuk beson që ai ta ketë refuzuar këtë propozim, duke e quajtur një fake news.
Propozimi i kryetarit Basha për hapjen 100% të listave dhe më pas refuzimi i kryeministrit Rama?
Ilir Meta: Nuk e besoj të jetë refuzuar propozimi i Bashës nga Rama. Nuk e besoj të jetë i vërtetë, duhet të jetë fake news.
Përshëndes këtë akt të përgjegjshëm dhe historik të Bashës dhe opozitës së bashkuar që ka dhënë dakordësinë e tij të hapjes 100% të listave, të kandidatëve për deputetë, që deputetët e ardhshëm të jenë pronë e qytetarëve të Shqipërisë dhe jo zara të kryetarëve të Partisë, që ngrenë kartonët duke dhunuar Kushtetutën, ligjin, interesin kombëtar dhe atë publik.
I nxis palët që sa më shpejtë të punojnë deri në 30 korrik, 31 korrik, 1 gusht, 2 gusht, bashkë me ekspertët më të mirë të ODIHR dhe BE për të gjetur format dhe mënyrat më të mira të funksionimit të listave 100% të hapura në mënyrë që në Shqipëri të vendoset parlamentarizmi që është goditur aq rëndë që nga 2008.
Në këtë mënyrë, Basha tregon jo vetëm lidership, përgjegjshmëri dhe respekt për qytetarët shqiptarë, por edhe shlyen një gabim të PD-së, që votoi atëherë për mbylljen e listave. I jepet frymëmarrje demokracisë dhe qytetarëve i jepet mundësia të kenë përfaqësuesit ë tyre dhe kjo është një gjë shumë pozitive.
