Damian Gjiknuri, përfaqësues i Partisë Socialiste në Këshillin Politik, u shpreh se opozita nuk ishte e gatshme të vijonte dialogun dhe diskutimet mbi ndryshimet Kushtetuese.
“Pëlqimi ishte dhënë me kohë në lidhje me të gjitha paketat. Unë propozova që edhe në vazhdën e takimeve të vazhdonin diskutime për ndryshimet kushtetuese që mundëson hapjen e listave. Thirrja jonë dhe e Presidentit të Republikës ka qenë të ketë dialog.
Edhe sot tentuam të vazhdonim dialogun. Nuk patëm dakordësi në këtë drejtim dhe në këto kushte procesi vazhdon.
Ky është qëndrimi i tyre dhe ne menduam që në përgjigje të të gjithë partnerëve, Këshilli Politik mund të ishte forum shumë i mirë, por megjithatë kjo mbetet zgjidhja e tyre”, tha Gjiknuri.
Gjithashtu ai theksoi se mbetet pjesa e fundit, Kodi Zgjedhor që do mundësojë implementimin e rekomandimeve të ODIHR-it.
“Ne ishim të gatshëm të vazhdonim diskutimin lidhur me amendimet kushtetuese sot opozita nuk e shfaqi këtë”, tha Gjiknuri.
