Mos ndërrimi në kohë i filtrave të gazit në kompaninë “Alba Gaz”, çoi në plagosjen e tre punëtoreve paraditen e së mërkurës në Elbasan.
Ngjarja ndodhi rreth orës 10.30 të së mërkurës. Ata ishin duke punuar si çdo dite kur njëra nga bombolat shpërtheu si pasojë e presionit të krijuar në një nga filtrat e gazit.
Abcnews raporton se nga kompania nuk janë zbatuar kushtet e sigurimit teknik.
Amortizimi i kushteve te fabrikës së gazit por edhe moszbatimi i kushteve teknike thuhet paraprakisht se ka qenë shkaku që çoi në plagosjen e tre punonjësve.
Sipas të dhënave, gazi që përpunohet në këtë fabrikë përzihet me oksigjen dhe squfur dhe kthehet në të lëngshëm dhe përdoret për pijet alkoolike, por edhe sheqerin.
Një nga të plagosurit është teknik i mesëm i cili është përgjegjës për mbarëvajtjen teknike të kësaj fabrike. Ai bashkë me të tjerët ndodhen në spitalin e Elbasanit nën kujdesin e mjekëve.
“Babë e bir, Qemal dhe Eduard Bendaj aktualisht ndodhen në repartin e Kirurgjisë ndodhen jashtë rrezikut për jetën. Ndërsa, Qemal Mullahu, i cili është dhe i dëmtuari më rëndë nga rrjedhja e gazit, është transportuar në repartin e reanimacionit, pasi si pasojë e shpërthimit ka dëmtime në fytyrë,” raporton abcnews. /abcnews.al/
