Këshilli Politik pritet të mblidhet në orën 11:00 të së hënës për të diskutuar mbi ndryshimet Kushtetuese që konsitojnë në hapjen e listave të kandidatëve për deputet dhe koalicionet parazgjedhore.
Kryeministri Edi Rama lidhur më këto të fundit ka thënë se ato nuk do të ndalohen por do të formësohen sikundër janë në çdo vend europian, ku partitë mund të garojnë me një listë të përbashkët kandidatësh, dhe jo sikundër ka qenë deri më sot, çdo parti me listën e saj, brenda një koalicioni.
Këtë qëndrim Kryeministri Edi Rama pritet ta mbajë dhe mbrojë edhe në mbledhjen e Këshillit Politik, i cili duket se ndryshon format.
Rama do të ketë në krah Damian Gjiknurin, i cili edhe më parë ka qenë pjesë e Këshillit Politik.
Ndërkohë që opozita e bashkuar e drejtuar nga PD, krahas përfaqësuesve të saj, Oerd Bylykbashi (PD) dhe Petrit Vasili (LSI) ka angazhuar edhe Gazment Bardhin, Sekretarin e Përgjithshëm të demokratëve.
Edhe ajo që njihet si opozita parlamentare ka vendosur të përforëcojë pozitën e saj në këtë Këshill, ku krahas Rudina Hajdarit, do të jetë edhe Myslym Murrizi.
Më shumë ky i fundit duket se do të jetë një ndihmë për Ramën, për shkak të kërkesave ekstreme që ka parashtruar në daljet publike. Kështu Murrizi kundërshton marrëveshjen e 5 qershorit, ndërsa kërkon depolitizimin e Komisioneve Zgjedhore, ide kjo që mbështetet nga Rama, por që më pas shoqërohet me qëndrimin se “marrëveshja e 5 qershorit, nuk do të preket”.
Murrizi pritet të mbajë të njëjtin qëndrim edhe në Këshillin Politik, ndërsa me shumë gjasa Rama do të shfaqet “i moderuar” duke mos ia pranuar këtë kërkesë, por në anën tjetër do t´i kërkojë opozitës së bashkuar që të pranojnë listat e hapura dhe një formëzim të koalicioneve.
Deri më tani Kryeministri është justifikuar se nuk i ka votat në Kuvend për të miratuar marrëveshjen e 5 qershorit, e cila kërkon mbështetjen e 84 deputetëve, ndërsa PS zotëron 74 vota.
Në fakt pasi një pjesë e deputetëve të opozitës parlamentare deklaruan votat pro marrëveshjes së 5 qershorit, po të shtohen këtu edhe votat e Tom Doshit nga PSD dhe 3 deputetëve të PDIU, atëherë tejkalohet numri 84.
Gjithsesi, Rama preferoi që të mbështesë qëndrimet e një pjese tjetër të asaj që njihet si opozita parlamentare, duke miratuar nen për nen ndryshimet Kushtetuese në Komisionin e Ligjeve dhe Këshillin e Legjislacionit.
Tashmë pritet nëse Këshilli Politik do të mund të dakordësohet lidhur me çështjet që shtrohen për diskutim, çka mund të çonte në një tjetër marrëveshjes mes opozitës së bashkuar dhe mazhorancës së drejtuar nga Edi Rama.
